Ejercito nisaad nga motabang pagpalambo sa mga ospital sa probinsiya

CEBU, Philippines — Nisaad si Senador Joseph Victor "JV" Ejercito nga motabang sa Cebu Provincial Government sa pagpangita’g pundo aron mapalambo ang mga ospital sa probinsiya isip kabahin sa pagpalig-on sa serbisyo sa panglawas ubos sa Universal Health Care Act (UHCA).

Atol sa iyang pagbisita kagahapon sa Sugbo gipadayag ni Ejercito ang maong saad diin iyang giubanan si Gobernador Pamela Baricuatro sa pag-inspeksiyon sa pipila ka mga ospital sa probinsiya aron tan-awon ang ilang kahimtang ug mga proyekto nga angay unta'ng mapundohan.

Nagsugod ang ilang pagbisita sa Cebu Provincial Hospital sa Dakbayan sa Danao ug nakatakda usab sila’ng mobisita sa mga ospital sa Lungsod sa Minglanilla ug Dakbayan sa Carcar sa samang adlaw.

Isip tagsulat sa Universal Health Care Act, gipasabot ni Ejercito nga ang sunod nga tumong sa gobiyerno mao ang paglig-on sa gitawag nga service delivery network ilabina ang mga primary ug secondary nga ospital.

Gikataho nga napauswag na sa gobiyerno ang mga apex hospital sama sa Vicente Sotto Memorial Medical Center (VSMMC) hinungdan nga panahon na nga hatagan og pagtagad ang mga ospital sa mga probinsiya.

Human sa inspeksiyon sa ospital sa Danao, gipadayag ni Ejercito nga nakita niya ang mga kausaban nga nahimo sa administrasyon ni Baricuatro apan aduna pa gihapoy daghang angayang buhaton.

Usa sa iyang nakita mao ang wala mahuman nga building sa ospital nga makadugang og kapin doble sa bed capacity ug mahimo usab nga adunay bag-ong operating room ug intensive care units (ICUs).

Matud ni Ejercito nga mas sayon nga mapundohan ang maong proyekto tungod kay kaniadto pa kini gisugdan apan wala lang nahuman.  BDB BANAT NEWS