Yulo humarbat ng 7 ginto sa Batang Pinoy

BAGUIO CITY , Philippines  —   Isang 10-anyos na Manileno ang kumolekta ng pitong gold medals sa gymnastics, habang limang swimmers ang sumikwat ng tig-apat at isang trackster ang nagtakbo ng tatlo sa 2018 Batang Pinoy National Finals kahapon dito.

Kinolekta ni Karl Jahrel Eldrew Yulo ang mga gintong medalya sa floor e­xercise (9.10), vault (9.55), pommel horse (9.70), parallel bars (9.10), rings (9.15), horizontal bar (9.50) at individual all-around (56.100) sa men’s artistic gymnastics sa BCHS Gymnasium.

“Masayang-masaya po kasi naka-pitong golds po ako,” ani Yulo, kapatid ni da­ting Philippine national team member Carlos Yulo, isang Grade 5 student ng Aurora Quezon Elementary School sa San Andres, Manila.

Sa nakaraang 2018 Palarong Pambansa sa Vigan, Ilocos Sur ay humakot si Yulo, pangarap katawanin ang bansa sa Olympic Games, ng apat na gold medal sa floor exercise, mushroom, individual all-around at team championship para sa National Capital Region.

Sa Baguio Swimming Pool, inangkin nina Micaela Jasmine Mojdeh ng Parañaque City, Zoe Marie Hilario at Althea Michel Baluyot ng Quezon City, Roz Ciaralene Encarnacion at Roshanne Ysabel Biglete ng Laguna ang kani-kanilang ikaapat na gold.

Nanguna sina Mojdeh (girls’ 12-under 200-meter butterfly), Hilario (girls’ 13-15 200m freestyle), Baluyot (girls’ 13-15 200m butterfly), Encarnacion (girls’ 12-under 100m breaststroke (1:19.70) at Biglete (girls’ 12-under 100m backstroke) sa kanilang mga events.

Sa pagtatapos ng swimming competition ay nagposte ang mga Lucena City tankers ng kabuuang 13 gold, 4 silver at 1 bronze sa pangunguna nina Mervien Jules Mirandilla at Markus Johannes De Kam kasunod ang Laguna (13-2-6), Quezon City (10-4-2) at Puerto Princesa City (7-8-1).

Sa athletics sa Baguio Athletic Bowl, itinakbo ni Jason Jabol ng Dasmariñas City, Cavite ang kanyang ikatlong ginto nang maghari sa secondary boys’ 200m run (22.7) at nakasama sa 4x100m relay (44.83) para ikabit sa nauna niyang panalo sa 100m run (11.59).

Itinakbo naman ni M­arielle Estreba ng Cebu Province ang ginto sa 13-15 girls nang dominahin ang triathlon event.