EDITORYAL — Pinusposay nalang

Nangita gyud og bikil ang China sa Pilipinas para duna silay rason nga gamiton ang ilang kusog diha sa West Philippine Sea. Nagkagrabe ang ilang kaagresibo karon nga nakita nilang nagkadaghan ang mga nasud sa kalibotan nga nidapig sa Pilipinas bahin sa isyu sa WPS.

Kagahapong adlawa,  gituyo gyud og adto sa Chinese Coastguard ang Ayungin Shoal diin nahimutang ang BRP Sierra Madre ug nagbahis-bahis didto ang ilang fiber glass speedboat.

Tungod sa ilang presensya didto, niresponde ang mga sakop sa Philippine Navy gikan sa BRP Sierra Madre aron sila abugon. Sakay sa ilang rigid hull inflatable boat, niadto sa mga sundalo ang speedboat sa Chinese coastguard aron sila abugon.

Apan imbes nga mopatuo, ilaha naman hinuong gidasmagan ang mga sakop sa Philippine Navy, ug pagkahuman, gipangpusposan ang atong mga sundalo gamit ang mga kahoy ug bugsay.

Ang nahitabong pagpangatake nakuhaan og video ug napakatap dayun kagahapon, Hulyo 20 sa social media nga miani og pagsaway ug kalagot sa mga Pilipino.

Kung tan-awon og maayo, ikaduha na ni nga insidente sa maong lugar nga pisikal gyud nga gipasakitan sa mga Chinese ang mga tropa sa Pilipinas nga nadestino didto.

Sa una, naa gyuy sundalo nato nga naputlan og kumagko, karon naay usa sa mga sundalo nato ang nasamdan sa ulo tungod sa pagbunal.

Planado gyud kaayo sa mga Chinese nga nanulong sa lugar kung unsa ilang buhaton, dili malinawon ang ilang tuyo kondili bitikon sa laang ang mga sundalong Pilipino. Nagdala na sab silang daan og tag-as nga pamuspos.

Nasayod sila nga ang mga bangka sa BRP Sierra Madre mga RHIBs lang, ug dili makasugakod og binanggaay mao nga ilaha rang gisayon-sayon ang pagdasmag kay kabalo silang mas mauna og kalunod ang mga Pilipino. Gipangandaman na unta kining daan sa PN human sa unang insidente. Samtang dili parte sa polisiya sa Pilipinas ang manguna og gamit og armas, kinahanglan armasan sab og mga bunal ang mga nadestino didto.

Kani tanang gibuhat sa China gidesinyo ni para mabikil ug mapugos ang Pilipinas og gamit og armas. Kung mamuspos ang mga Chinese, dapat sab mamuspos ang atong mga sundalo.