Milapas sa linya

Klaro nga usa ka porma sa rasismo ang bag-ong video nga gipagawas sa China Daily nga naghulagway sa mga Pilipino nga mga unggoy sa padayong kasungian tali sa Pilipinas ug China sa teritoryo diha sa West Philippine Sea.

Ang maong video dili lamang usa ka seryosong insulto ug diskriminasyon sa katawhang Pilipino.

Usa usab kini ka dakong paglapas sa linya nga naghatag og walay respeto sa katawhan sa laing kanasuran.

Kontrolado sa kagamhanan sa China ang China Daily.

Apan bisan pa niini, kinahanglan nga aduna kini dakong responsibilidad sa paghatag og husto ug patas nga impormasyon isip usa ka media outlet.

Ang rasismo ug ubang insulto sa ubang katawhan dili na angay himoong instrumento sa diplomasiya sa international community.

Gani dili na kini angay nga motunga pa sa bokabularyo niining modernong panahon.

Ang kasamtangang relasyon sa China ug Pilipinas puno sa tensiyon tungod sa isyu sa West Philippine Sea. Ug ang pag-resort ngadto sa rasismo naghatag lamang og dugang kadaut sa maong isyu nga angay ra unta maulbad pinaagi sa pagsunod sa balaod.

Ang video sa China Daily usa ka lakang pagdaugdaug ug pagpakunhod sa pagkatawo sa mga Pilipino.

Ug naghatag kini og mensahe nga ang rasismo mahimong gamiton isip armas sa politika ug diplomasiya.

Klaro nga kini usa ka hulga sa kalinaw ug diplomasiya tali sa mga nasud.

Mao nang kinahanglan nga tinud-on sa gobiyerno sa Pilipinas ang pagsang-at og mga diplomatikong lakang batok niining ngil-ad nga klase sa rasismo.