Barbers, ayaw maulit ang kaso ng 990 kilos ng shabu!

MAY rekomendasyon si Rep. Robert Ace Barbers para hindi na maulit ang kapalpakan sa nakumpiskang 990 kilos ng shabu noong 2022. Nagsagawa kasi ng hearing si Barbers, ng House Committee on Dangerous Drugs, para tuklasin ang recycling, reward system at komisyon sa mga “asset” at marami siyang natuk­lasan na hindi na dapat pamarisan pa. Eh di wow!

Siyempre, ang unang napuna ni Barbers ay ang umano’y “cover-up” kay Sgt. Rodolfo Mayo Jr., na namamahala ng WPD lending sa Tondo, Manila kung saan nakagarahe ang 990 kilos ng shabu. Ang 32-page na report na kinalabasan ng hearing ni Barbers ay nai-forward na sa PNP, Napolcom, Department of Justice at Office of the Ombudsman noon pang Disyembre 2023.

Kaya lang, wala namang kumilos sa nabanggit na ahensiya ng gobyerno para ipatupad ang rekomendasyon ni Barbers na kasuhan si ex-PDEG chief Brig. Gen. Narciso Domingo at kanyang mga tauhan na nagresponde sa palpak na operation sa 990 kilos ng shabu. Ang findings at conclusions kaya ni Barbers ay hindi rin aaksiyunan? Araguyyy! Sayang lang ang taxpayers money na ginugol ni Barbers sa hearing pag nagkataon, di ba mga kosa? Dipugaaa!

Maliban sa “cover-up’ kay Mayo, nasa findings din ni Barbers, ayon sa testimonya ng 82 resource persons kasama si ex-PNP chief Junaz Azurin, na ang pagbibigay nang malaking portion ng narekober na shabu sa “assets” ay kasalukuyan pang pinapraktis ng mga ahensiya ng gob­yerno. Aniya, ang shabu na nakumpiska sa WPD lending ay produkto ng drug recycling dahil illegal na itinabi ang mga ito sa dating mga anti-drug operations. Ano pa nga ba? At higit sa lahat, walang buy-bust operation laban kay Ney Atadero, ang caretaker ng WPD lending, dahil naroon na siya sa premises nang arestuhin. Tsk tsk tsk! Namadyik si Atadero, ‘no mga kosa?

“The PNP DEG operatives brazenly disregarded the chain of custody rule under Sec. 21 of RA 9165 when they unreasonably delayed the conduct of the required inventory and photograph of the seized 990 kilos of shabu in the presence of the witnesses and excluded PSG Mayo from the spot report on the alleged raid,” ayon pa kay Barbers. Sanamagan!

Ilang miyembro ng PNP-DEG na kasali sa operation, ay inumit at hindi inilista ang nakumpiskang ebidensiya, imbes itinago pa ang 42 kilos na nabawi malapit sa Camp Crame. Ang pagka-release naman kay Sgt. Mayo para sa follow-up operation sa Pasig “is a complete deviation of the SOP outlined in the PNP Manual on Anti-Drugs Operations and Investigation.” Hehehe! Alam kaya ni Junaz ito?

“There was no legitimate hot pursuit operations conducted against Sgt. Mayo on October 9, 2022. Instead, said operation was merely a pretext used to conceal the earlier arrest of Sgt. Mayo,” ang giit pa ni Barbers. Dipugaaa! Puro drawing, ‘no mga kosa? Ang operating units na pinangunahan nina Lt. Jonathan Sosongco at Lt. Ashrap Amerol, committed serious procedural lapses, tulad ng planting of evidence kay Atadero at pagtago ng seized drugs.

Sina Domingo, Col. Julian Olonan, Lt. Col. Arnuldo Ibañez, Maj. Michael Angelo Salmingo at iba pa na pumayag na i-release si Sgt. Mayo para sa follow-up operation sa Pasig ay “liable for violations of PD 1829 and RA 3019. Hehehe! Kapos na sa ispasyo. Mapapansin kaya ang rekomendasyon ni Barbers? Abangan!