Lain-laing matang sa kakabos

Segun sa datos sa Philippine Statistics Authority (PSA), gibanabana nga 12.8% sa mga Filipino anaa sa hut-ong sa gitawag og multidimensionally poor niadtong tuig 2024.  Ang banay nga multidimensionally poor mao kadtong nakasinati’g mga hagit o pagsuway nga naka-apektar sa kalidad sa kinabuhi dili lamang sa income kon dili sa ubang aspeto sama sa edukasyon, trabaho, panglawas, access sa tubig, puloy-anan, ug kalinisan. Matud pa sa akong silingan, “Mahimo ba diay’ng bungkag-bungkagon ang ka-pobre sa tawo?  Kon menos ka’g panginabuhian, dan menos ka na usab sa uban’g kaayohan.” Muleeng!

Nahitagpilaw ang hustisya

Matud pa ni Assistant Ombudsman Mico Clavano, aduna na’y 42 ka testigo ang ilang buhatan sa reklamo’ng plunder, graft, bribery ug money laundering batok kang kanhi Speaker Martin Romualdez kabahin sa kontrobersiya sa flood control projects.   Pulos ra gyud paukyab ug paglangay-langay ang Ombudsman sa kaso ni Romualdez.  Nagsugod na baya’g balitok ang ubang testigo. Matud pa sa akong amigo’ng abogado, “Buta tinuod ang hustiya apan ang kadugay sa Ombudsman nga mopasaka’g kaso, nagmatuod nga taud-taud na kining nahitagpilaw.” Madahaan!

Kadungganan batok kagawasan

Giuyonan sa Supreme Court ang pagkonbikto sa usa ka police officer sa salaod nga psychological violence nga nahasupak sa R.A. 9262 kon Anti-Violence Against Women and their Children Act tungod sa pagbakwi sa akusado sa ilang marriage application sa tuman lang nga kasayon bisan kon mabdos na ang babaye.  Ang pagbuhat sa ingon mitadlas na sa yano nga kasakit ug kaguol ngadto na sa dominyo sa “psychological violence”. Mao kana’y giingon sa mga katigulangan nga, “Kaniadto, kon dili ka modayon og pangasawa, kadungganan ra nimo ang mamantsahan, apan karon, mahanaw na gyud ang imo’ng kagawasan.” Fezteleern!

Likay lang sa gubot

Sumala pa sa Chief of Staff ni Mayor Nestor Archival nga si Kenneth Siasar, dili kuno micromanager ang mayor kon dili usa ka hands-on leader kinsa buot lamang masayod kon unsa’y panghitabo sa palibot sa tibuok dakbayan sa Sugbo.  Depensa ni Siasar ang maong pamahayag sa mga pagsaway nga naani sa mayor sa pagpangunay niini pagpanilhig sa dalan.Makapahinumdum sa bana nga gisungog nga under-de-saya sa iyang asawa, apan mitataw sa iyang baruganan sa pag-ingon nga, “Dili man ko “under”, likay lang ta’s gubot ba.” Paleho la!

“Government employee” na

Mipahigayon ang Philippine Carabao Center (PCC) og duha ka animal entrustment activity nga gitumong sa pagpalig-on sa panginabuhian ug pagpalambo sa milk production sa mga sakop sa duha ka nagkalainlaing community association Nueva Ecija ug sa Quezon Province.  Makapahinumdum kini sa laing programa sa PCC nga mao ang pagpamalit og kabaw nga maayo ug kugihan ang kaliwat aron maoy himoong ehemplo sa ilang buhatan.  Apan sa dihang napalit na nila ang kabaw, natapulan na man kaayo kini ug magsige na lang og tuna sa lunangan. Gitataw hinuon sa tag-iya kanhi sa kabaw ang sitwasyon sa pag-ingon nga, “Natapolan na ang kabaw kay government employee na man siya.” Pagkatoytoy!