Alyas sa panguwarta
Hangtod karon, tulo ka tuig na human nahurot ang P612.5 milyones nga confidential funds (CF) ni Bise Presidente Sara Duterte, wala pay napresentar nga ebidensiya unsay natabang sa nasud nilang Mary Grace Piattos ug sa gatosan nga nakadawat sa kuwarta:
Duna bay seryusong hulga sa nasudnong seguridad nga nabadlong ang P500 milyones nga CF sa Office of the Vice President (OVP) niadtong 2022 ug 2023?
Duna bay dakong katalagman batok sa mga estudyante ug mga eskuylahan ang napugngan sa P112.5 milyones nga CF sa Department of Education (DepEd) niadtong 2023?
* * *
Hangtod nga mapamatud-an ni VP Sara nga bayanihong mga buhat ang bugti sa pagkatilok sa iyang CF, ang mga ngalan nga gibutang sa kaliboan ka acknowledgment receipts dili ikakumparar ni Senador Robinhood Padilla ngadto sa mga alyas sa nasudnong mga bayani.
Mangahas mi og sugyot nga suguon ang iyang staff (ambot kinsa na lay nahibilin human ni-resign ang chief of staff ug ang kanhi artista nga gidudahang naghithit sa pansayan sa Senado) sa pagbalik og konsulta sa Google aron paglista og mas haom nga mga alyas sa sunod niyang barug sa impeachment trial.
* * *
Aron mas mogaan ang ilang trabaho, mosugyot ko sa mosunod:
1. William Sanders ug Jane Ryan, alyas nilang Ferdinand Sr. ug Imelda Marcos sa pag-abli sa labing unang sekreto nga Swiss bank accounts nga dunay $356 milyones (nasakpan sa Philippine Commission on Good Government ug nabawi ang hangtod sa $683 nga deposito ug ubang kinawat nga katigayonan);
* * *
1. Jose Velarde, alyas ni kanhi Presidente Joseph Estrada sa iyang bank account sa Equitable PCI Bank nga dunay P3.2 bilyones nga gidudahang gikan sa jueteng ug kickbacks (usa sa nakapaulbo sa Edsa Dos nga nipalayas ni Erap sa Malakanyang, nga nihatag og agianan sa mas dagkong eskandalo nga gipasangil sa siyam ka tuig ang administrasyon ni kanhi Presidente Gloria Macapagal-Arroyo); ug
2. Jose Pidal, gidudahang alyas ni kanhi First Gentleman Mike Arroyo sa UnionBank nga dunay P450 milyones nga mga transaksiyon sa giingong money laundering operations nga gibisto ni Senador Ping Lacson niadtong 2003 (pero napawong ang kontrobersiya human giangkon ni anhing Kongresista Iggy Arroyo, manghod ni Mike, nga siya si Jose Pidal).
* * *
- Latest
