Grabe ka perfectionist

Daghan natong mga tawo ang buot gyud og perfection kun kahingpitan.

Usa kini ka maayong tinguha apan sa laing bahin ato usab angkunon nga tawo lamang kita ug nagkinahanglan og grasya gikan sa kahitas-an aron mabatonan nato ang kinabuhing hingpit ug balaan.

Tungod niini daghang pressures ang gihatag nato sa atong kaugalingon. Lakip na niini ang lawasnon, emosyonal, ug espirituhanong aspeto sa atong kinabuhi. Nakalimot kita nindot ang kinabuhi busa angayang saulogon.

Apan wala kini magpasabot nga wala lang kitay pagahimoon aron por lo menos mamahimong tarong ug han-ay ang atong kinabuhi.

Diha sa atong panaw sa kinabuhi sa pagtuo, mahinungdanon nga atong pagaisipon ang Dios ingon nga atong Amahan nga nahigugma kanato ug dili Dios nga padayong nagngita sa atong sayop.

Tinuod masalaypon man kita apan dili kini unta ang himoon natong hinungdan aron mas malisud alang kanato ang pagsabot sa Diosnong kalambigitan tali kanato ug kaniya.

Gimahal kita niya bisan pa man sa atong mga kahuyangan. Gimahal kita niya bisan pa man sa atong mga kasal-anan.

Ang atong mga sala mura og tinulo ang kalooy sa Dios mura og dagat! Dili man tuod kita hingpit apan gihigugma kita sa Dios sibo sa atong bili ug dili sibo sa atong mabuhat.

“Ginoo dili ako angay mga mokalawat nimo apan ipamulong lamang ug mamaayo ako!”