Banga ang gobiyerno

Namahayag si Press Officer Claire Castro nga segun sa kasaligan’g inpormasyon nga nadawat sa DFA, atoa na karon si Zaldy Co sa Pransiya diin nangayo kini og political asylum sa maong nasud.  Sa kadako sa budget sa intelligence funds sa Malacañang, makalibog kon ngano’ng dili gyud matultolan ug madakpan gilayon si Zaldy Co.  Ang pagtago sa kamatuoran, isip kabahin man sa konspirasiya, dili unta mahimong kabahin sa sistema sa atong kagamhanan.  Hinuon, matud pa sa akong higala’ng abogado, “Dili konspirasiya, kon dili pagka-bangâ sa gobyerno ang mas madawat nga pagpasabot ngano’ng dili madakpan si Zaldy Co."  Fezteleern!

“Kusga kay ngitngit”

Miawhag ang Power for People Coalition (P4P) sa Energy Regulatory Commission (ERC) nga idili lang una ang pagpatuman og electricity disconnection sa mga power companies taliwala ni’ng kalisod nga giatubang sa katawhan gumikan sa kagubot sa Middle East.   Makaagwanta pa man tingale ang mga power companies kon dili pa sila makapaningil sulod sa pipila ka bulan apan malisod alang sa mga kabos kon walay elektrisidad.  Kon mahitabo nga magngiob ang balay, hayan mohangyo ang mga bungol nga, “Kusga ang imong tingog kay ngitngit.”  Madahaan! 

Maanod ang nahikatulog

Atol sa executive session sa konseho sa dakbayan sa Sugbo, giangkon sa Prime Integrated Waste Solutions, Inc. (PIWSI) nga mipahigayon na sila og partial resumption sa ilang operasyon sa Binaliw Landfill nga gikahikurat sa konseho kay gipaubos pa man unta sa padayong imbestigasyon ug rehabilitasyon ang maong pasilidad.  Matud pa sa pipila ka sakop sa konseho, nalipat sila sa maong kalambuan. Mora’g naigo ni’ng kahimtanga ang konseho sa panultihon nga, “Ang nahikatulog nga “uwang” (pasayan), maanod gayod sa bahâ.”  Muleeng!

Napa-akan sa bitin

Usa ka turista didto sa Hurghada sa Ehipto ang namatay human napaakan sa kobra samtang nagtan-aw sa usa ka snake show tungod kay misugot man ang maong turista nga pakamangon ang bitin sulod sa iyang pantalon.  Ignorante ba kaha o naghinobra lang ang hambog sa biktima?  Makapahinumdum sa duha ka manag-higala nga nag-camping diin, sa ka-dimalas, napaakan ang usa sa bitin diha mismo sa iyang kinatawo.  Nanawag dayon ang iyang kauban sa doktor, kinsa mitambag nga ipa-supsop lang ang dapit sa pinaakan.  Kay dili man makaako ang iyang higala sa pagsupsop sa kinatawo sa biktima, iya na lang giingnan ang iyang higala nga, “Bay, ingon ang doktor nga mamatay na kuno ka.”  Atala lagee!

Nahimo’ng komedya

Nanawagan ang Visayas Unified Truckers Association ngadto sa mga kagamhanan’g lokal nga i-synchronize nila ang ilang truck ban schedule aron adunay hapsay nga dagan sa ilang operasyon.  Angay tinuod nga ma-synchronize ang oras sa truck ban sa matag LGU.  Dakong baligho nga padaganon na ang truck sa usa ka lugar unya pahunongon ra usab sa laing lugar.  Matud pa sa usa ka truck driver, “Nanginabuhi ra man unta ‘mi apan nahimo’ng komedya na ang among trabaho kay sama ra nga nagsulbad kami’g Rubik’s Cube o ba kaha nagdula’g “Trip to Jerusalem” samtang nagbiyahe.”  Pagkatoytoy!