Inantigo nga paagi

Suporta ko sa gihimo sa mga sakop sa Carbon Police Station nga mosuroy sila sa lainlaing bahin ubos sa ilang teritoryo, ug kon makakita sila og mga tawo nga katahapan ang nilihokan, ilang pangutan-on kon wa ba kini gihuptang mga kontrabando.

Unya, hangyoon nila ang mga tawo nga alsahon ang ilang mga T-shirt aron nga makita kon wa ba sila’y giluklok nga mga hinagiban kay gidili man sa balaod nga magdala og kutsilyo, ug ubang hait nga hinagiban, labaw na og armas.

Basta dili lang mangunay ang kapolisan nga sila maoy morekisa sa mga tawo, nga sila ang moalsa sa mga gisul-ob nga sinena niini, maisip ra kini nga boluntaryo ug wa gidili sa balaod. Unsa man diay ang gidili ug maisip nga illegal? Ang Article III, Section 2 sa 1987 Constitution naglatid niining mosunod:

“The right of the people to be secured in their persons, houses, papers, and effects against unreasonable searches and seizures of whatever nature and for any purpose shall be inviolable, and no search warrant, or warrant of arrest shall issue except upon probable cause to be determined personally by the judge after examination under oath or affirmation of the complainant and the witnesses he may produce.”

Mao nga ang mga opisyal sa kapolisan nga maghimo og ingon niini nga matang sa police operations, kinahanglang magtoon gyud pag-ayo sa balaod kay bisan pa og dunay butang kontrabando nga makuha gikan sa usa ka tawo, dili gihapon kini dawaton sa hukmanan isip ebidensya kon nakuha kini sa ilegal nga paagi.

Makaingon ko nga kadtong mga tawo nga moreklamo niining gihimo sa kapolisan, gusto ra diay sila nga dunay mga tawo nga yano ra nga magdaladala og armas nga makapatay, ug gamiton kon dunay kontra ang maong mga tawo?

Pinaagi gud sa gihimo sa kapolisan, mahimo man nga kadtong mga badlongon sa katilingban magpanagana na sa pagdala-dala’g armas nga makamatay kay mahadlok man nga basin sila madakpan.

* * *

Nganong nadawat man si Joel Rentuma sa Primero Eagles Security Agency? Siya kadtong guwardiya nga mipusil ug mipatay sa duha ka tawo nga way gihimong daotan, ug igo lang nangatawa. Grabeha niining maong gwardiya no, tungod lang kay sila si Renato Belanizo ug Vicente Gemuta nakit-an niyang nagkatawa, nagtoo na si Rentuma nga siya ang gibugal-bugalan ug gikataw-an.

Nganong nakalusot man si Rentuma sa Neuro Test nga utok pulbora man diay ni siya? Nahibaw-an sab sa kapolisan nga kini si Rentuma, nakonbikto na diay og homicide.

Nabilanggo na diay si Rentuma kaniadtong 2011 ug human sa 10 ka tuig ug tulo ka buwan nga pagkabilanggo, nakagawas ug mi-apply pagka guwardiya.