Unsaon pag-transfer sa pangan sa titulo sa yuta nga napalit?

Dear Atty. Divine,

Duna mi yuta og Deed of Absolute Sale ra ang among gikuptan sukad pa niadtong 1989. Kami ang nagbayad sa buhis ug karon gusto namo nga ma-transfer sa among name ang original nga titulo. Kining yutaa agricultural land naka encumbered pa sa Landbank ug kining maong titulo nakapangan ug na award sa among amahan. Unsay angayang buhaton aron among ma process ang pag-transfer sa title. Daghang salamat. -- Mark

Dear Mark,

Aron inyong masugdan ang pagprocess sa transfer, mas maayo nga magpahimo mo og bag-ong Deed of Absolute Sale nga pirmado sa imong amahan ug inahan ug dapat kini notarized. Kun inyong gamiton ang karaan nga Deed of Sale hayan madak-an kamo sa bayranan sa penalty tungod  kay dugay ninyo bayri ang taxes sa pag-transfer. Human niini, inyong ipa-compute sa BIR ang Capital Gains Tax ug Documentary Stamp Tax og inyo kining bayran. Ang BIR adunay list of requirements alang sa pagpa-compute sa Capital Gains ug sa Documentary Stamp Tax ug kini naglakip sa certified true copy sa title, certified true copy sa tax declaration lakip na sa improvements kun duna, og ang notarized nga Deed of Absolute Sale ug uban pang dokumento. Kun aduna na kamoy computation sa taxes inyo kining bayran og i-submit sa BIR ang tanang dokumento nga ilang gikinahanglan aron sa pag-process sa Certificate Authorizing Registration or CAR. Once ma release na ang CAR inyong bayran ang transfer tax ngadto sa Assessors Office diin mahimutang ang property og human niini inyong i-submit sa Register of Deeds alang sa pagpa issue og bag-ong title. Kon naa na moy bag-ong titulo inyong isunod sa pag-process ang pag-transfer sa Tax Declaration ngadto sa Assessor’s Office. Thank you and God bless. -- Atty. Divine

* * *

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.