Ehemplo ug suporta

Hinaut pahimuslan sa dakbayan sa Sugbo ang ehemplong gibuhat sa The Freeman ug Banat News aron pag-agni sa ubang dagkong balay patigayon pagsunod pagpanghawan sa ilang mga illegal nga istraktura nga nakalapas sa three-meter easement zone.

Ang management sa The Freeman ug Banat News boluntaryong miguba sa pader kilid sa buhatan niini nga misaylo sa 3-meter easement gikan sa Parian Creek.

Kun buot huna-hunaon wala gyud makasampong sa agianan sa tubig ang maong paril apan tungod lagi kay nasulod man gyud siya sa easement zone hinungdan nga gipaguba kini sa management agi usab ug pagpakita sa suporta sa mantalaan ngadto sa kampanya sa syudad batok sa baha.

Ang hinungdan nganong gibutangan to og koral sa management aron pagprotehir sa mga ekipo niini gikan sa mga kawatan. Gani dihang naguba na ang paril naghugop dayon ang mga kawatan hinungdan napugos ang management pagkuha og dugang gwardiya nga makabantay didto sa luyo.

Ug aron di makawang ang ehemplong gipakita sa The Freeman maayong pugson sa kagamhanan sa syudad ang ubang mga edipisyo sa maong dapit nga mosunod.

Apan sigun sa akong nadunggan gihatagan kuno sa kagamhanan og unom ka buwan ang tupad nga edipisyo pagpanghawan.

Taas na ang unom ka buwan ug nabalaka ko nga mahug ra pud ni sa kalimot sama sa unang mga ultimatum nga ilang gihatag.

Mentras init pa angayang paspasan sa syudad ang lihok niini kay labihan na kadako sa ilang gasto niining kampanya batok sa baha pagkuha og mga consultant gikan sa kaulohan.

Ug hinaut nga isip kabahin sa mas lapad nga kampanya sa syudad nga mamahimong sama sa Singapore, atimanon pud ang siguridad pinaagi sa pagbutang og mga polis sa matag-eskina nga makabadlong sa mga kawatan.