Katekesis No. 111

Gasa

Tinuod daghan na kaayong nitumaw nga mga balita, pamaagi kun unsaon paghimo sa kinabuhi sa tawo nga mas matarong pa ug mamahimong nindot.

Nisugwak pud karong mga panahona ang mga nagkadaiyang mga spirituality, mga karisma ngadto, ngari.

Apan sa kadugayan atong nasuta ang uban kanila murag nahimong halayo na gyud sa pagtulon-an sa simbahan ug nasambogan og mga patuo tuo ug uban pang mga esoteric practices.

Kining maong mga balansayon maoy nakahatag hinuon og dugang kalibog sa mga matuohon. Kay bisan gani ang Tagdumala ang dali ra kaayo mahaylo labina kun malambigit na gyud ang salapi.

Ang salapi nga nakapahimo sa bisan unsa nga supak nga mauyonan ug sa bisan unsang gidili nga matugotan. Nahanaw ang orthodoxy ning panahon sa kawalay kasegurohan.

Ang gasa nga gikan sa Dios dili magdala og kalibog hinunoa kalinaw. Ang gasa nga gikan sa Dios magdala og kahiusahan ug dili panagbulag.

Tungod sa tinguha nga mapakaylap ang usa ka debosyon, nagpasabot ba kini nga imo na lang kining itupad sa parokya o simbahanan nga bag-o pa lang gitukod?

Mas maayo pa nga ang maong parokya mao na lang usab ang simbahanan nga nagdala sa susamang debosyon. Nigawas naman hinuon nga dunay dakong kompetensiya tali sa parokya ug sa simbahanan alang sa bisan unsang debosyon.

Nahimo nga dunay duplication sa bisan unsang akto sa pagsimba ug pag-ampo nga wala mahatagi og igong katekesis.

Daghan usab nga nanggawas karon nga mga mananambal nga nagdala sa ngalan sa Ginoo ug sa Mahal nga Birhen apan ang ilang paagi nahimong dakong sukwahi sa ilang matang sa pagkinabuhi.

Apan daghan ang makisapi karong mga panahona mao nga bisan kun dili makiangayon ug halayo sa husto ila naman hinuong ikonsentir.