Madayon na gyud ang BRT

Moanhi gyud diay sa Cebu si Presidente Bongbong Marcos karong Pebrero 27 aron motambong sa ceremonial groundbreaking sa Phase-1 sa Cebu Bus Rapid Transit (BRT).

Ang Phase-1 sa BRT magsugod sa atubangan sa Kapitolyo ug anha magsubay taliwa sa Osmeña Boulevard paingon sa Fuente Osmeña ug ngadto na sa eskina P. del Rosario ug liko paingon sa Natalio Bacalso Avenue.

Giuna nila diha kay mas lapad man ang karsada nga Osmeña Boulevard paingon sa Natalio Bacalso Avenue. Ambot kaha sa ubang karsada, sama sa Escario Street.

Ang rota sa BRT manukad sa Barangay Bulacao subay sa Natalio Bacalso Avenue, liko sa Osmeña Boulevard paingon sa Kapitolyo, liko paingon sa Escario ngadto na sa Ayala flyover, ug liko sa wala paingon sa Archbishop Reyes Avenue ug ngadto na sa Governor Cuenco Avenue lahus na sa Talamban, ug vice versa.

Kon mangutana mo nako nga dili ba kaha maproblema ang traffic kon magsugod na pag-operate ang BRT nga hatagan og duha ka “exclusive lanes” sa tunga sa karsada, moingon ko nga sigurado gyud.

Aw, hinuon, giplano na man to nilang daan kaniadto pa nga ang ubang sakyanan dili na tugotan nga makaagi sa mga karsada nga adunay rota ang BRT.

Matud pa nga ang mga private vehicles, second priority ra ug posibleng did-an na kini sa pag-agi sa karsada nga adunay BRT route, ug mga PUJ na lang ang hatagan og prayoridad.

Ingon sa malantawan nakong daan nga kon gikan ka sa Talamban ug mopaingon ka sa Bulacao, ang katapusang barangay sa Cebu City dapit sa south, aw mosirit ka lang gyud kay wa may traffic ang BRT lanes.

Resulta lagi niini, ang mga sakyanan nga mag-agi sa masi’g ka daplin sa karsada nga anaa ang BRT route, makasinati gyud og problema sa traffic.

Estoryahan pa namo ni sa Cebu City Traffic Board kon unsaon nga dili kaayo makasinati og grabeng traffic kon magsugod na ang BRT.

Nindot man ang BRT basta lapad pa unta ang atong mga karsada, apan daghan sa mga karsada nga agian sa rota sa BRT pwerteng gagmaya.

Kini lay hunahunaa. Traffic man gani karon nga wa pa ibani og duha ka lanes ang tunga sa karsada para sa “exclusive lanes” sa BRT, unsa pa kaha kon gamay na lang ang agian sa mga sakyanan?

Ang nindot unta mao nga ang kagamhanan mipalapad na daan sa karsada sa dili pa ipatuman ang BRT. Ang nag-unang proponent sa BRT nga kanhi mayor, miingon nga mosakay na lang gyud kuno ta sa BRT.

Ambot og siya moundang ba kaha pagsakay sa iyang sakyanan.