Pamaskong pagpamukaw

Sa usa sa mga misa-nobena nga gipahigayon alang sa kapistahan sa Archdiocesan Shrine of Our Lady of Guadalupe de Cebu, nangutana ang bisitang pari (pilgrim’s priest) panahon sa iyang homiliya ngadto sa nanimbahay: “Kinsa ba karon kaninyo ang ania dinhi, nga kompleto tibuok pamilya ang nanag-uban sa pagpanimba? Iisa ang inyong kamot!”

Mura ko'g nahugno. Midalikyat pagyahat sa masig ka kilid:  sa tuong bahin, sa may wala ug hangtod sa likod. Apan bisan namong mga lector, cantor, lay minister ug choir, kinsa pirme nangalagad sa simbahan ug anaa mismo manglingkod atubangan o duol sa altar, wala gyoy bisan usa nga mipataas sa binukhad nga palad. Pagkasubo paminawon!

Unya, nahinumdom ko. Sa bata pa ko, dad-on gyod ming mga anak nila ni Nanay ug Tatay pagpanimba kada Domingo. Labi na sa mga Misa de Gallo, diin bugnaw kaayo ang hangin sa Disyembre nga mosapigad sa among kalawasan samtang nanglakaw sa dalan paingon sa daw nagpanawag-nanag-awit nga mga bagting sa kampana.

Dihang may kaugalingon na kong pamilya, akong gipaningkamotan nga mapasunod ang mga espirituhanong hiyas nila ni Tatay ug Nanay ngadto sa among mga anak ni misis. Pero maayo lang sa gagmay pa sila kay ikauban namog simba kanunay. Pero pagkadagko ug nangaminyo na, wala na, uy!

Usa ko sa naigo sa wali sa pari, kinsa mipadayag nga kini kuno karon ang nahimong dakong suliran sa Simbahang Katoliko: ang nagkaanam kadaghang tawo, kinsa nagpalayo na sa atong Magbubuhat ning panahon nga mao nay mihari sa kalibotan ang gahom sa internet.

Hinungdan, gidasig sa simbahan tanang magtutuo nga magtinabangay sa pagpangita sa maong mga karnerong nawala ug oras nga makit-an, dad-og balik sa mga mapasayloong kamot sa atong Magbalantay ug Manluluwas, kinsa nagpaka-tawo ug ihimugso sa lalang sa Espiritu Santo pinaagi sa ulayng sabakan ni Birhen Maria ning umaabot Disyembre 25, 2022.

Kaluwasan natong makasasala ang Iyang gidala-tanyag. Apan kadto rang nakapanglimpyo sa mga sala ang makadawat sa kaluwasan. Busa, mangandam kita sa Iyang pag-abot. Kadtong atong kaigsuonan nga wala nay simbasimba, manimba na!  Mangompisal ug mangalawat.

Buwahan, nunot sa paskohanong awit ug pagpanglupad sa mabulokong fireworks ug kuwitis, matagmtaman nato ang tinuoray’ng kalipay ug kahulogan sa Pasko.