Descase kay dehado

Tungod kay nangiwit sa survey, nakahukom na lang si Deputy Speaker Rodante Marcoleta nga moatras na lang sa iyang kandidatura pagka-senador.  Dalaygon ang pagdawat ni Marcoleta sa kamatuoran nga kawang lang ang pagpadayon taliwala sa mga tilimad-on sa kapakyasan.  Makapahinumdom sa estorya sa usa ka swimmer nga misuway paglangoy gikan sa Bohol paingon sa Cebu.  Sa dihang miabot na siya duol sa Talisay, gibati na gayod siya sa tumang kakapoy mao nga nakahukom na lang siya nga dili mopadayon sa Cebu ug mobalik na lang paglangoy paingon sa Bohol.  Pagkatoytoy! Bantay-salakay

Gikompiska sa Bureau of Customs ang mokabat P3.4 milyones nga kantidad sa gidudahan nga shabu apan gitakuban pinaagi sa paghingalan niini nga mga “diaper bags” nga gikan sa Incheon, South Korea ug pagtago niini sulod sa backpack.  Bisan sa kadaghan sa paagi pagpalusot sa mga kontrabando, masakpan gihapon kini kon igmat lang usab ang mga awtoridad.  Apan kon kunsabo sila sa pagpayuhot, bisan ipatandang ang kontrabando, dili ug walay makita ang mananakop.  Ginaingon bitaw nga “Makasalig ka sa imong irô nga bantayan niya ang imong balay, apan dili ka gayod makasalig sa irô nga bantayan niya ang imong sud-an”.  Fishkots!

Gaan ang dilâ

Matud pa ni DILG USec. Jonathan Malaya, aduna na’y gilatid nga contingency plan ang COMELEC ug ang PNP kon ugaling adunay mga kasamok nga mahitabo sa pagpahigayon sa eleksyon karon’g Mayo 9.  Kabahin sa maong plano ang pagpakatap og daghan’g polis sa mga lugar nga gitumbok nga election hotspots.  Dili dautan ang managana apan kon ang tumong sa maong tabi-tabi o pasidaan mao ang pag-kondisyon sa hunahuna sa tawo, angayan kita’ng magmabinantayon.  Gaan man unta ang dilâ apan daghan ang dili makadaug sa gibug-aton niini mao nga motabi gayud hinungdan nga mokatap ang fake news ug pagpanghulga.  Fezteleern!

“In aid of re-election”

Gisaway ni senatorial candidate Harry Roque ang mga imbestigasyon nga napahigayon sa senado sa nangagi tungod kay sagad niini igo lang sugdan apan walay nahimong maayong sangputanan. Natumbok ni Roque ang dugay na’ng gikasagmuyô sa katawhan nga pag-usik-usik sa mga senador sa pundo sa gobyerno tungod niining maong mga imbestigasyon. Gilauman man unta nga masuta ang kamatuoran pinaagi sa pag-imbestigar.  Apan sa atong nasinati, mora’g gidesinyo ang imbestigasyon sa senado nga walay mapalgan nga sad-an.  Tataw nga gitumong ang imbestigasyon “in aid of re-election”.  Madahaan!

Let’s plant camoté

Sumala sa survey nga gipahigayon sa SWS, dili momenus sa 24.7% sa labor force sa Pilipinas ang walay trabaho sa pagtapos sa tuig 2021.  Nagkahulogan kini nga adunay 11 ka milyon ka Pinoy ang walay mga ugmad.  Ginaingon nga ang pagka-walay trabaho usa ka maayong magtutudlo.  Aduna ka na’y panahon nga makapamalandong.  Ni’ng kakulang sa trabaho, angayan tun-an ug balikan ang pagpanguma ug pagpananom.  Matud pa sa among maestro sa high school sa higayon nga dili kami makatubag sa iyang pangutana, “Better go home and plant camote”.  Hala no!