Nabanhaw nga kagawasan

Sunodsunod nga mga dagkong kalihokan ang gipahigayon nga gidagsaan sa mga tawo diin lakip na niini ang mga adlaw nga gitimaan nato, ang Semana Santa nga wala nay kalainan dihang wala pa nahitabo ang pandemic gawas lang seguro sa pagsol-ob sa facemask, apan duna ganiy wala na magsul-ob og facemask.

Puno ang mga simbahan ug ubang mga dapit gipahigayon ang mga kalihokan sa pagpamalandong. Mora’g nabag-ohan ang mga tawo nga naghigwaos nga mihimo sa mga naandan nga gimbuhaton tungod kay nahikawan man kita sulod sa duha ka tuig sukad miigo ang pandemic.

Kagahapong adlawa sa pagsugat sa Pasko sa Pagkabanhaw nahibalik na ang mga naandan nga sugat, nasaksihan na ang mga sayaw sa mga bata nga nagsul-ob og mga pako o mga angel. Gani ako nga na-cover sa kalihokan sa Easter Sunday gibati nga naangkon na nako ang kagawasan.

Mora’g nakamata na kita sa lawom nga pagkatulog diin nakasinati ta og dautang damgo o urom mahitungod sa COVID-19 nga naghatag kanato og kalbaryo sa hataas nga panahon.

Tinuod makapagaan sa gibati nga nahibalik na kita sa kanhi natong kahimtang nga gawasnon na sa atong pagabauhaton. Apan luyo niining tanan nagpahipi pa gihapon ang kabalaka sanglit anaa pa man lagi ang virus sa atong palibot.

Basin baya kon mabali nga imbis nahigmata na kita sa lawon nga pagkatulog diin nasinati nato ang dautang damgo, mabali na hinuon ang sitwasyon nga ang panghitabo niining bag-o lang nga nahibalik na kita sa normal usa lang ka nindot nga damgo apan inig mata nato nagpabilin pa gihapon ang kamatuoran nga naghamok pa gihapon ang COVID-19.

Dili layo ang posibilidad nga mahitabo kini kong mosubra na ang atong kompiyansa nga mosangpot simbako lang sa dakong urom ang tanan nga maglisod na og higmata ang mga tawo nga madayonan sa pagkatulog.

Ang mga beaches lang hilabihan ka puno sa mga tawo nga dasok, mga bata hangtod na sa mga tiguwang. Aw, mas gamay ra kini itandi sa mga grand rally sa mga kandidato.

Seguro nagsalig na ang mga tawo kay bakunado naman ang kinabag-an maong para nila dili na sila madutlan og virus o kon madutlan man dili na magrabehan. Maayo unta magpadayon na kini ang naangkon nga kagawasan apan angayan hinumduman usab natong tanan nga dili nato kini abusaran. Kay kong mosobra na usab ang atong pagpasagad, nasayod na kitang tanan sa asa ang atong padulngan simbako lang.

Dungan sa Pasko sa Pagkabanhaw ang pagkabuhi usab og balik sa atong kagawasan nga nawagtang tungod sa pandemic.