Komusta ang inyong pamilya

Niay akong nasindolan nga article gikan sa daan nakong mga clippings giulohan Secrets of Strong Families. Ang mga sekreto sa lig-on nga mga banay. Kitang mga senior citizens halapad kaayo ang atong mga kasinatian mahitungod niini, and most probably, nakasaksi kita personal sa mga nanghitabo karon sa atong mga pamilya.

Ilabi na karon nga medyo niuso na ang panagbulag ug panagbungkag sa pipila ka mga banay, pakapinan pa sa daghan natong magbabalaud nga dakung uyon pag-legalize sa diborsiyo sa atong nasud. Kay matud nila, kita na lang kono ang nasud nga wala pa motugot sa diborsiyo.

Atong masabot nga maoy ilang gusto nga mag-ilis-ilis sila’g mga asawa, sumala sa atong makita sa mga western movies.

Mag-ilis-ilis og asawa o bana sama sa pag-ilis-ilis og medyas o brief.

Hayahaya nila no?

Anyway, mao na kini karon, ang pag-modernize sa mga Filipino families, sama sa pag-modernize sa atong mga PUJs.

Apan,una sa tanan, kining pangutana: “ Why do some families survive life’s crises, and prosper while others are overwhelmed?

Ngano nga ang ubang mga pamilya makasugakod man ug magmalampuson sa taliwa sa mga katalagman ug krisis sa kinabuhi, samtang ang uban, nagsangkiig man, resulting sa panagbungkag sa pamilya (kaluoy sa mga anak, magdaku nga walay klarong amahan o inahan).

Padayon: “Do strong families still exist.” Ikaw, unsay imong tubag niini?

Wala na bay lig-on ug malambuon nga mga banay sa atong nasud?

Mao na bay nag-prevail karon ang mga mahuyang nga pamilya?

Tubag nila: “After 30 years as marriage ang family counsellors, we know that despite the average family’s ups and downs, the answer is YES. What puzzled us was why so much media attention focused on the down side of family life. “

Alang sa mga marriage ug family counsellors, taliwa sa mga suliran nga atubangon sa average nga banay,  daghan gihapon ang mga lig-on ug mauswagon economically nga banay. Ang ilang gikatingad-an ngano nga ang gihatagan og pagtagad sa media mao man ang mga banay nga nagkaguliyang.

Kahibawo man ta nga ang orientation sa ubang sakop sa media, nga ang good news dili news at all, fake news kini, samtang ang bad news  maoy tinuod nga news.

Kahinumdom ko nga usa sa among kauban sa kanhi Department of Public Information (DPI), gipadala ngadto sa Indonesia ba kadto, alang sa usa ka seminar on public information.  Pag-uli niya nagdala siya’g mantalaan (tabloid size), mga kapin sa 50 pages, diin ang front page, ang banner headline, hulagway sa public library nga giinagurahan.  Ang mga “crime’ pages, gilubong sa mga inside pages.

Dinhi sa ato, bali’ kini. Ang mga bad news, sama sa mga makutlo gikan sa police blotter, maoy mag-occupy sa mga front pages; banner headline pa gyud, ug sa mga balita sa radyo. 

Apan, kon kanunay ma-headline ang mga maayong balita dinhi sa ato ug sa ubang dapit sa nasud, maka-catch ba kaha kini og attention sa mga magbabasa?  Tan-awa ang social media, mas daghan ang mo-likes sa mga bad news kay sa good news, kon duna may good news. Di ba?

Atong padayunon sa pagtoki ang six secrets of strong families sa sunod natong lindog.