Ang mga kabataan karon

Dunay mga panahon nga makasinati ko og nostalgia sa kagahapon. Akong angkunon nga dili sayon tong akong naagian  kaniadto sa akong panahon sa pagkabata. Sayo ko nahigmata sa kalisud sa kinabuhi ug gani nagdako ako nga naninda og biko, budbod ug tableya, ug balut.

Tagdugay ko matulog mga ala una na sa kaadlawon ug sayo ko momata aron modeliver sa mga paninda sa dili pa ako moadto sa eskwelahan.

Pun-an pa nga daghan kaayong bully bisan pa sa mga sakop sa pamilya. Apan ang tanan akong gisagubang gumikan sa determinasyon nga molampos bisan pa man sa mga pagsulay. Ang mga bully? Awh bun-og ang uban samtang usahay ako ma black eye. Walay surrender ug mahuyang ra ang mohilak.

Hinuon kadtong mga bata nga akong nakontra kaniadto nahimo man Nakong mga higala sanglit nakaamgo man kami nga dili pinaagi sa kapintas pagatawgon ikaw nga maisog.

Apan lahi na karon ang kabataan. Wala mabutang sa hustong lugar ang kaisog. Ang kaisog kaniadto gamiton aron pagpanalipod sa kaugalingon. Ang kaisog karon gigamit aron pagdagmal ug pagpatay. Mga bata nga gipamusil. Batang babaye namatay kay gikulata sa iyang mga classmates.

Magtutudlo nga buntis nalandig sa tambalanan kay gisumbag sa iyang grade 10 nga estudyante. Dunay mga bata gidunggab ug uban pa.

Mao ba kini ang paglaum sa atong nasud? Mao ba kini ang hulagway sa bagong pilipinas bagong mukha? Sa akong tan-aw salimuang lamang ang tanan.

Dunay giidolo ang mga kabataan nga mga pintas nga personahe. Ang mga pagtulon-an ug baruganan ilang na-internalized nga walay igong paggamit sa hunahuna.

Ang bugtong mahimo nato mao ang pagpaningkamot nga ma spread ang kaayo ug gugma aron sa ingon mamahimo kining alkontra sa kapintas ug kabangis ning maong kaliwatana.