Curfew ug epekto

Hapit na magduha ka semana human giwagtang ni Cebu City Mayor Mike Rama ang curfew diin gitugotan na ang mga negosyo sa pagdawat og mga kustomer sa tibuok nang kapasidad sa ilang adlaw-adlaw nga operasyon. Uban sa abli nga polisiya nga gipakanaug sa mayor ang paglibkas usab sa curfew sa mga hamtong.

Tumong ug tuyo sa paglibkas sa curfew mao ang pagpabangon sa ekonomiya sa dakbayan sa Sugbo nga gipalukapa sa COVID-19 ug bagyong Odette nga mihatag sa katawhan og kauhaw tungod sa kanihit sa tubig, kangitngit tungod sa pagkaputol sa linya sa koryente ug kamingaw tungod sa pagkaputol sa internet connection hapit sa usa ka bulan. Sa Executive Order nga gipagawas sa pangulo sa usa ka milyon ka mga molupyo sa dakbayan sa Sugbo, gisulti sa Mayor nga ang tanang negosyo makahimo na sa ilang operasyon sa tibuok nga kapasidad ug ang katawhan aduna nay kagawasan sa ilang mga kalohokan ubos sa kondisyon nga sundon lamang ang minimum health protocols nga gipatuman sa dakbayan.

Giklaro sa mayor nga ang pagbangon sa ekonomiya taliwala sa mga negatibong epekto sa kalamidad ug sa hapit magduha ka tuig nga gipatuman nga mga lockdown tungod sa COVID-19 maoy gikinahanglan sa dakbayan. Tungod niini gilusad sa Mayor and Oplan Kagawasan.

Tungod sa Oplan Kagawasan daghan nang negosyo ang nagbago na sa oras sa ilang negosyo nga naghatag og dakong panahon sa mga kustomer sa pagpahimulos sa ilang serbisyo ug produkto. Dinhi atong nakita nga mihinay-hinay na sa pagbangon ang nalukapa nga ekonomiya sa dakbayan sa Sugbo.

Dihang nagpatuman og lockdown ang mayor sa pipila ka mga lugar sa dakbayan sa Sugbo ug midili sa mga dili bakunado sa pagkaon sa mga kan-anan, daghan ang nasuko kaniya ug mibahad nga dili nila siya iboto sa umaabot nga piniliay.

Apan wala kini tagda sa mayor tungod kay mas mahinungdanon kaniya nga mapanalipdan niya sila sa mananakod ug makamatay nga virus.

Karon nga luwas sila samtang gibalik na kanila ang kagawasan sa paglihok-lihok subay sa gipatuman nga health protocols angay nga magpasalamat na seguro sila ni Mayor Mike Rama.