Tukma nga desisyon

Alang sa tanan nga grabe nga naapektuhan sa COVID-19, ang lakang ni Mayor Michael Rama pagtangtang sa curfew sa siyudad sa Sugbo usa ka maayong desisyon bisan pa sa atong padayon nga pagpakigbisog batok sa coronavirus pandemic.

Ang desisyon ni Rama nga ibasura ang curfew naggumikan sa iyang tumong nga mobangon na ang siyudad ug moarangkada na ngadto sa ekonomikanhong kalamboan.

Ang sektor sa patigayon sa siyudad hingpit na nga nagdagan ubos sa usa ka mas relaks nga sitwasyon. Usa kini ka timailhan nga ang lokal nga ekonomiya nagsugod na sa pag-uswag tungod kay ang mga tawo karon hinay-hinay na nga naggahin og panahon sa gawas sa ilang panimalay.

Tungod niini, dalaygon ang desisyon ni Rama pagsalibay na sa curfew. Gani, sa atong nakita, nagsugod na kanindot ang klima sa negosyo sa dakbayan. Gumikan niini, mas mosamot pa unya ang paglambo sa lokal nga ekonomiya. Hinuon, adunay downtrend karon sa mga kaso sa coronavirus disease sa dakbayan gumikan sa higpit nga pagpatuman sa mga health protocol sa otoridad. Dako usab ang natabang sa vaccination drive diin gatusan na ka libo sa siyudad ang naka benepisyo.

Tungod kay daghan na ang gitugotan paggawas sa ilang panimalay, kinahanglan usab nga motuman ang katawhan sa mga health regulation sama sa pagsul-ob kanunay og facemask. Kinahanglan nilang hinumdoman nga aduna silay mahinungdanon nga papel sa kampanya batok sa COVID-19.

Ang lakang ni Rama pagwagtang na sa curfew ug sa ubang regulasyon batok sa COVID-19 usa ka tukma nga desisyon taliwala sa dakong kampanya sa pangagamhanan sa siyudad pagbangon sa lokal nga ekonomiya.