EDITORYAL - Bawal ipakasal ang bata

Gihimo nang usa ka kalapasan sa balaod ang pagpakasal sa mga menor de edad dinhi sa Pilipinas human pipila ka dekadang pagpangusog sa mga adbokasiya batok niini gikan sa nagkadaiyang suok sa katilingban dili lang dinhi sa nasud kondili lukop kalibotan.

Lahi ra man gyud isipon nga ang usa ka batang babaye o batang lalaki pagatawgong pangasaw-unon ug pamanhon kun itandi sa mga sakto na sa edad nga mga babaye o lalaki nga tawgong kaslonon o mag-minyo.

Dinhi sa Pilipinas ang legal nga edad 18-anyos, babaye man o lalaki. Mao gani nga bisan sa mga balaod niini, dili mahimong bilanggoon ang 17-anyos paubos nga nakahimo og krimen hangtud dili matino kun nasayod sila sa ilang gibuhat nga kini supak sa balaod, kasagaran wala gyud mahibawo sa gibug-aton sa ilang gibuhat.

Sama ra sab kini og gikondenar o gigapos ang batang babaye o lalaki sa pagpugos kanila sa kaminyoon bisan sa kalinghod pa sa ilang panghunahuna.

Peligro kini sa panglawas sa mga menor de edad nga sayong mamabdos ug makapahunong sab sa ilang edukasyon ug paglambo sa ilang kaugalingon sama sa ubang kabataan.

Daghang mga batang babaye didto sa Mindanao ang pugsanong gipaminyo sa mas tiguwang pa kanila bisan supak sa ilang kabubut-on.

Tradisyon ug kulturang kinaraan, ingon man kapobrehon ang hinungdan nganong padayon kining gihimo sa ubang mga dapit sa Pilipinas.

Ang maong balaod nga Republic Act No. 11596  gilagdaan ni Presidente Rodrigo Duterte niadto pang Disyembre 10,2021 apan niadto lang Enero 6, 2022 gipagawas sa Malacañang.

Ang makalapas mabilanggo og hangtud napulo ka tuig ug pabayron og multa nga P50 mil. Ang masilotan mao ang mga responsable sa pagpakasal sa menor de edad apil na niini ang solemnizing officials, sama sa pari, mga mayor, pastor, Muslim religious officials ug uban pa.

Pasilotan sab kadtong mga hamtong makigpuyo og menor de edad. Kun opisyal sa gobiyerno ang solemnizing officer tangtangon kini sa serbisyo ug dili na makahupot og bisan unsang posisyon.

Tungod sa maong balaod, tanang kaminyoon nga naglambigit og menor de edad gikonsiderar nga void ab initio  o sayop sa pagsugod palang daan.