Hangyo ni Efren “Bata” Reyes

Bata pa ko, humag tabang pagpanindag ginamos ni anhing Nanay Totang sa merkado, modalikyat ko’g adto sa bilyaran nga gidumala ni Mang Teddy, kanhi kampanero sa among Balamban Parish Church kang kansang patron mao si San Francisco de Asisi, diin saulogon ang kapiyestahan ning umaabot Oktubre 4.

Makalingaw tan-awon ang matag dumbol sa tadhang mga bilyarista. Bisag lisod ang nahimutangan sa bolang maoy tirahon, maigo gihapon kini, unya masulod sa lungag.

Samtang ang bolamano morag adunay mata ug utok. Adto mohunong sa sunod bola nga maoy gipreparahan sa nagdumbol ug sayon na lang kaayong pasudlon. Hangtod tanang bola mahurot ug dili na katira ang kontra.

Nagtuo kong sila na ang kinahawrang mga bilyarista. Pero nabaraw dihang may miingon, nga ang ilang abilidad layo ra kuno sa bilyaristang Efren ‘Bata’ Reyes, kinsa maoy pirmeng manghawod didto sa kaulohan ug sa nagkalainlaing dapit nga sulngon niya ug sa iyang mga manedyer, kinsa di mahadlok mopusta’g dako.

Gumikan niini, sukad sa akong pagkagamay, nangandoy kong masaksihang modula si Bata sa personal.

Apan hasta kapila na lang magpiyesta ang Balamban, wala gyod masaag si Bata sa among lugar. Hinuon, nagtubo ko nga iyang ngalan nagpadayon sa pagka-popular dili lang sa atong nasod. Kondili, sa tibuok kalibotan.

Base sa kasaligang tinubdan, si Bata nakadaog og sobra 70 ka lainlaing titulo sa international billiard pool tournament nga iyang giapilan.

Aniay pipila: Four-time world eight-ball champion, The 1999 WPA World Nine-ball championship winner, Three-time US Open winner, Two-time World Pool League winner ug 14-time Derby City Classic winner.

Ingon niini kadako-habog ang garbong nahatag ni Bata sa atong nasud.

Sa ka pobre sa Pilipinas, iyang giisa sa kinatas-ang dapit ang atong bandera aron hangdon-saludohan sa mga datong kanasuran.

Dili na mapapas sa kasaysayan ang kabantog nga iyang nahuptan.

Apan aduna siyay gihangyo: “When the day comes that I am old and can’t play, I hope you won’t forget me, who gave honor to the Philippines that I love.”

Hangyo nga salabtonon kaayong gipunting dili lang kutob sa katawhan. Kondili, ngadto usab sa atong kagamhanan.

Pangandoy kaha ni Bata nga buhatan siyag bantayog? Unta, mahatagan kini’g igong pagtagad ni Tatay Digong.