Pet owners sa subdivision

Ang mga subdibisyon maoy puloy-anan sa mga tawong gustog kahilom, kahusay ug kakomportable sa pamuyo, ilabi na sa gabii nga gikan sila sa hagong trabaho o kapanginabuhian, diin ang lapoy nilang lawas nagkinahanglan nga makapahulay’g tarong.

Apan subo palandungon nga adunay subdibisyon, diin imbes pang-residential lamang ang angay ug eklusibong tumong, gihimo na hinuong komersiyal.

Adunay homeowner nga nagtukod og tindahan. May mipabarog og ordinariyong balay nga nahisupak sa standard operating rules and regulations nga maoy ipasunod sa subdivision. Unya gihimo pa kining boarding house, diin sagad sa nangabang, morag gikan sa slum areas, puwerting sabaa!

Luoy intawon ang mga desenting silingan. Kay nag-antos sa kabanha sa pamilyadong boarders ug kabaho sa mga biyang putos niini nga anha lang ipanglabay sa bakanteng lote nga iyaha sa tupad nga homeowner.

Ang nakapamaot pagsamot, ang inalisngaw sa naugang ihi ug hugaw sa mga irong binuhi sa house boarders ug homeowners.

Kay bisag usa ka adlaw lang nga dili kini malimpiyohan, mahanggap gyod sa mga silingan ang kaaslom- lang-og nga bahong dinala sa hangin panahon sa tingkaon.

Hinuon, may pet owners sa subdibisyon nga limpiyada. Suwerte ka, kon makasilingan niining klaseha.  Perog hugawan? Magsige’g kaguba imong nawong, uy!

Bitaw, hangyo lang ngadto sa tanang subdivision homeowners, kinsa hilig mamuhig iro. Please be a very responsible pet owner. Paningkamoti nga sa inyong pagpanag-iya og mga iro, dili kamo makahasol, o makahatag og sakit sa inyong silingan.

Health is wealth. Ilabi na ning panahon sa pandemiya nga wala gihapoy hunong ang pagpanakod sa gikahadlokang COVID-19.

Kinahanglang batonan nato kanunay ang kalimpyo sa atong palibot. Kon kita may pet dogs, kinasingkasing natong sundon ang Republic Act No. 9482 or Anti-Rabies Act of 2007, diin nalatid ang kinatibuk-ang responsibilities sa mga pet owner.

Dili sayon ang pagbuhig iro. Grabe kahago. Mora pod kag nag-alimag anak. Akong datong kauban kanhi sa trabaho, dihang nasakit ilang iro, gipatsek-ap dayog doktor ug giadmit sa tambalanan. Unya, sa nakagawas na, pag-uli sa balay, minuskiterohan pa inig katulog.

Kining tanan akong nakita didto sa iyang selpon. Kay girekord man niya ilang gibuhat. Nakalingolingo ko. Ingon niini diay mopangga ang mga adunahan sa ilang binuhing iro?