"Let's get ready to rumble"

Gidawat ni Senador Manny Pacquiao ang hagit ni Presidente Duterte nga pamatud-an niya nga mas kurakot ang kasamtangan, kay sa nangagi’ng administrasyon.  Mibahad ang Presidente nga nganlan niya’g bakakon ang senador kon dili niya mapamatud-an ang gipamulong niini.  Agi’g tubag, gitumbok ni Sen. Pacquiao ang DOH nga maoy angay unahon pag-imbestigar.  Sa politika, walay permanente nga higala, apan adunay permanente nga kaikag o interes. Ginaingon usab nga “Ang labing kuyaw nga tawo alang sa gobyerno mao kadto maantigo mopensar sa iyang kaugalingon….nga way pagtagad ug kahadlok sa mga naandan’g tinuohan ug mga ginadili”.  Nagsugod na!

Angkon pa’y tigre

Mipasida-an si PNP Chief Gen. Guillermo Eleazar sa kapolisan nga kinahanglang magmatinud-anon ug magpabiling tapat ngadto sa ilang mga kapikas aron dili sila makalapas sa “Code of Ethical Standards nga may silot nga pagkapapha sa trabaho.  Tubag ang maong pasidaan sa panahom nga walay natigom ang mga pulis sa ilang sweldo kay sagad kanila nagtiner og mga kerida.  Mura’g lisod sumpo-on ang maong bisyo. Ning maong hisgutanan, sama kuno ang pulis sa ubang kriminal: “dili magpadakop nga buhi” ug lawom kaayo’g limod.  Matud pa bitaw sa pagya, “Basta Pulis, Matulis (hait)” Angkon pay tigre!

Dili angay ma-buotan

Mipirma’g kasabutan (MOU) ang PNP tali sa mga relihiyosong pundok sa katuyoan nga maatiman ang “psyco-spiritual” nga panginahanglan sa kapulisan.  Ang MOU gitumong sa pagpalambo sa panaglambigit sa simbahan ug kapolisan alang sa pag-umol sa usa ka “God-centered, Service-oriented ug Family-based” nga mga public servants.  Maanindot ang katuyoan sa MOU apan may kahingawa ang akong amigong pilosopo bahin niini.  Matud niya, dili kuno angay mabuotan ang mga pulis kay adunay panultihon nga “Kawatan ra usab ang dali makadakop sa laing kawatan”.  Madahaan!

Tawo ang tinubdan

Segun sa PhiVolcs, ang gabon nga mitabon sa Metro Manila naggumikan sa mga kalihokan sa katawhan, sama sa binuga nga aso sa mga sakyanan, ug dili gikan sa aso nga gibuga sa Taal Volcano.  Dili kahibudngan ang pamahayag sa PhiVolcs. Sa hisgutanan sa polusyon, andam ang tawo mo-abiba sa balaodnon alang sa limpyong hangin apan gahi motuman sa balaod nga nagpatuman sa “car emission inspection”.  Tukma ang pamahayag sa US Environmental Protection Agency nga “Nasayran na nato ang tinubdan sa polusyon; walay lain kon dili KITA ra usab”.  Pagkatoytoy!

Dako’g natampo ang virus

Sumala sa memorandum nga giluwatan ni Acting Mayor Michael Rama, buot niya nga mo-esplikar ang DOCAST Construction sa giingong kalapasan sa kontrata sa pagdumala sa garbage transfer station sa Inayawan.  Sama sa bahâ, ang basura usa ka malungtarong suliran nga giatubang sa kagamhanan.  Ang kayam-angan sa tawo maoy dakong hinungdan sa bahâ ug basura.  May kamatuoran ang obserbasyon nga “Sa paglimpyo sa kalikupan, mas dako pa’g natabang ang CORONAVIRUS, kay sa tawo mismo”.  Fezteleern!