Pailob, paabuta lang!

Gibutyag ni Budget Secretary Wendel Avisado atol sa pagdungog sa Senate Committee of the Whole (CoW) nga mikabat na sa P660.51 bilyones ang napagawas nga pundo alang sa pagtubag sa pandemiya.  Mipasalig usab si Finance Secretary Carlos Dominguez nga adunay igong pundo alang sa pagpatuman sa programa sa pagpamakuna.  Kon dili suliran ang kwarta, ngano’ng langan ug hinay man gihapon ang pagpamakuna? Gipaneguor sa kagamhanan nga molampus gayud ang maong programa apan magpaabot lang kita kon kanus-a.  Makapahinumdom sa karatula sa sari-sari store nga nag-ingon, “Way Utang Karon, Ugma Na”.  Pailob lang!

Kon dili mabawog, mabali gyud

Mi-insistir si DILG Sec. Eduardo Año, atol sa pagdungog sa Senado, nga ang mga polisiya sa nasudnong kagamhanan mahitungod sa pagbatok sa COVID-19 mopatigbabaw kay sa mga lokal nga ordinansa.  Reaksyon kini sa kalihim sa pamahayag ni Gob. Gwen Garcia nga ang kagamhanang lokal adunay katungod pagpatuman sa ilang kaugalingong polisiya.  Dili kini isyu kon unsa ang mopatigbabaw kon dili isyu kini mahitungod sa managlahi ug tinuod nga kahimtang sa usa ka lokalidad mahitungod sa pandemya.  Ginaingong bitaw nga “ang lagda nga dili mahimong bawogon, segurado gayod nga kini paga-balion”.  Isip-isip!

Regalo sa kaugalingon

Gitambagan sa Department of Trade and Industry (DTI) ang publiko nga magmabinantayon sa mga pyramid sales schemes nga midagsang karon sa internet luyo usab sa nagkadaghan nga reklamo nga nadawat sa ahensya.  Malisod hunongon ang online nga pagpamaligya/pagpamalit.  Kasagaran sa tawo modangop niining matang sa transaksyon tungod sa duha ka rason: Una, haum kini nga transakyon atol ni’ng pandemya; Ikaduha, maanindot ang bation sa online nga pagpalit, kay inig dawat nimo sa produkto, sama ka ra’g nagpalit og regalo alang kanimo.  Hala nooo?

Buot kab-oton ang langit

Usa ka Pastor Billy ang nasikop sa NBI pinaagi sa usa ka “entrapment operation” human ireklamo sa iyang mga nabiktima tungod sa giingong illegal recruitment.  Sa iyang pagka-Pastor, hayan mipasalig siya sa iyang mga kauban sa pagtoo nga mahidangat sila sa langit.  Sa iyang pagka-recruiter, “langit” tingale gihapon ang iyang gipasalig apan impyerno ang gidangatan sa iyang mga nailad.  Haum ang panultihon nga, “Ang naghingapin nga tinguha nga makab-ot ang langit dinhi sa yuta, moresulta na hinoon sa pagdangat nato sa impyerno”.  Fezteleern!

Kultura sa vote-buying

Pipila ka mga magbabalaod habig sa oposisyon ang miuyon sa panahom ni PNP Chief Police General Guillermo Eleazar nga dako ang kahigayonan sa digital vote buying sa umaabot nga eleksyon karong 2022.  Gihangyo nila ang PNP nga magmabinantayon aron mabatokan ang maong modus.  Dakong pagminaot ang pamahayag sa oposisyon.  Ang nagka-hitech nga pamaagi sa vote buying dili binuhatan sa katawhan kon dili sa kandidato mismo. Bisan hinganlan pa’g hinabang ang gihatag sa kandidato, vote-buying lang gihapon ang lintunganay niini.    Nalakip na kini sa atong kultura.  Subô palandungon!