Ang tinuod nga bulahan

Daghanan kanato kun maghisgot na gani kita og bulahan, ato gyud dayon kining i-associate sa mga tawong dunay maayong kapalaran in terms sa bahandi, dungog ug gahum. Alang kanato sila ra gyud ang gipanalanginan. Nahikalimot kita nga ang panalangin dili ra man diay kutob sa bahanding material sanglit duna pay mas labaw pa niana ug kana mao man ang atong kinabuhi mismo. Ang rason nga hangtod karon buhi ka pa sa gihapon maoy angay natong pasalamatan sa tinud-anay gayud.

Ang kakabus mao man ang pag-angkon nato sa atong kakulangan. Ako makaingon nga dili tanan nato maisip nga mga dato gyud. Matag usa dunay panginahanglan. Mahimong ang atong kakulangan, kahingpitan alang sa uban. Ang atong kahingpitan mamahimong kakulangan usab sa uban. Busa dili maayo nga atong itandi ang atong kaugalingon ngadto kanila.

Dunay duha ka matang sa kakabus. Ang actual poverty nga maoy nasinati sa kadaghanan kanato labina ning panahon sa pandemiya. Apan wala kini magpasabot nga dili kita adunahan sa mga butang espirituhanon. Dunay mga tawo nga anaa na nila halos ang tanan apan pabilin gihapong haw-ang ang ilang kinabuhi. Kini tungod kay dunay kuwang ug kana mao man ang Dios nga maoy tinubdan sa usa ka makahuloganong kinabuhi.

Pinasikad ning maong sukaranan hugtanon unta natong batonan ang birtud sa pagpaubos ug pangangkon nga nagkinahanglan gyud kita og Dios. Kun wala siya wala man kitay mahimo. Dugang pa, walay dato  nga wala magkinahanglan ug walay kabus nga walay ikahatag. Ang mga tinibuok nga kantidad nahimong nakompleto pinaagi sa mga ginagmay nga tampo. Matag sakop kinahanglang motampo aron sa ingon, kun mahuman naman gani ang bisan unsang paningkamot ang tanan dunay garbo ug pagpangangkon sanglit ang tanan man gyud nakatampo man.