Tinonto nga telco 2
May nangalisbo nga di mao sa promo sa usa ka kompaniya sa telepono. Ilang gilista ang handsets nga “compatible” kunohay sa ilang sim bisan sa kasayoran nga ang tanang telepono nga LTE (nga mao nay kinadaghanan karon sa tibuok kalibotan) “compatible” sa ilang sim.
Gani, kon tarungon lag istorya, ang ilang sim compatible sa tanang telepono. Bisan ang labing karaan nga 2G ug 3G makagamit sa ilang sim para sa text ug voice calls. Ang limitasyon mao nga di silang kapahimus sa mas kusog nga 5G nga gisaad sa bag-ong telco.
* * *
Di unta kapasanginlan ang bag-ong telco nga nangilad sa mga konsumidor kon, inay mag-promote sa mga teleponong baligya sa ilang partner nga mga tindahan, nisulti sila sa tinuod: Nga mas mapuslanon ang mas abante nilang teknolohiya sa LTE, 4G ug 5G nga mga telepono.
May sukaranan ang sibaw nga yawyaw sa mga konsumidor kay nabisto sa mga nakapalit na sa ilang sim nga mahimo ra diay’ng gamiton sa Android phones ug iPhones nga wa maapil sa lista ug nga naapil sa lista ang mga telepono nga di pa 5G.
* * *
Inay manalipod sa ilang kaugalingon sa pagdumili sa ilang pinili nga mga tindahan sa pagbaligya og sim kon di mopalit ang mga kustomer og bag-ong telepono, ang bag-ong telco nanginsulto na hinuon sa mga nanaway sa ilang promo.
Inay mopalihok og call center agents nga motarung pagpasabot sa mga lagda sa promo, gipakatap nila ang trolls nga nibalikas sa mga nangreklamo nga mga baho og baba, mga dilawan ug mga binayran sa karibal nga mga telco.
* * *
Ang kamaru sa bag-ong telco nakakita dayon og tugbang sa mat-an nga mga konsumidor: Nigamit sila og browser nga moilad sa website sa telco nga “compatible” ang ilang mga telepono ug malampuson nga nakaparehistro sa online promo sa libre nga delivery sa sim.
Pero mas maru gihapon ang telco. Akong kaila nga nakalusot online bisan di “compatible” ang iyang telepono nakadawat dayon og email nga niingon nga tungod sa kadaghan sa nagparehistro maabtan og tulo ngadto sa upat ka adlaw una sila maka-email pag-usab para sa, nakatag-an ka, dugang detalye unsaon sa pag-apil sa promo.
* * *
- Latest
