Ang pagkamanggihatagon ning malisud nga panahon

Ang Ikaduhang Konsilyo Plenaryo sa Pilipinas nagkanayon: “ Walay dato nga wala magkinahanglang ug walay kabus nga walay ikahatag.”

Kini mao ang sukaranan nga bisan pa man ning panahon sa dakong kalisdanan kinahanglan gihapon nga kita mopaambit.

Sa among gihimong virtual recollection nahimong among topic si Bishop Teofilo Camomot kang kansang beatipikasyon nga giproseso pa ning mga panahona karon.

Kining maong Sugbuanong Obispo nabantog kaayo sa iyang pagkamanggihatagon.

Usa mga timailhan niini mao nga sa panahon sa iyang lubong niadtong tuig 1988 daghang mga tawo ang nihatud kaniya sa iyang lubngangan.

Nabantog pud siya sa iyang bilocation nga mga butang, ingon man sab sa mga buhat sa kaluoy nga iyang gihimo.

Adunay mga mensahe ug mga hagit nga angayang sundon ug tumanon alang natong tanan. Kini naglangkob ning mosunod:

1. Kinabuhing Maampoon. Ang tawong manggihatagon, tawo usab nga maampoon. Daghang mga panahon ang gigahin sa maong obispo sap ag-ampo.

2. Simpleng kinabuhi diha sa pagpuyo sa kinabuhi nga  yano ug kontento sa bisan unsa nga anaa.

3. Pagkamanggihatagon. Bisan pa man sa mga higayon nga anaa siya sa maayong kapalaran ug sa panahon sa kalisod wala gyud siya maghinakog diha sa pagpaambit sa bisan unsa nga anaa kaniya.

Ingon ini ang kamanggihatagon ni Mons. Camomot. Unta kining maong sanglitanan makatabang kanato ug makadasig kanatong tanan diha sa pagpaambit sa bisan nga ania kanato. Gifted to give mao unta ang atong baruganan.