Pasalig kunhoran, serbisyo palabwan

Ni’ng pag-asumir ni Joe Biden isip bag-ong presidente sa Amerika, misagop gilayon siya sa usa ka napamatud-an na nga “political strategy” pagbatok sa COVID-19: “Pasalig Kunhuran,   Serbisyo Palabwan”. Una na’ng gisagop ang maong stratehiya dinhi sa dakbayan sa Sugbo pinaagi sa slogan nga “Lihok ang Pasultihon”.  Sukwahi kini sa gipamulong ni Napoleon Bonaparte nga “Kon buot kang molampos sa kalibotan, isaad ang tanan apan ayaw tumana bisan usa niini”.  Kining nagkasumpaki nga panultihon, gisumada ni Presidente Harry Truman sa pag-ingon, “Kon dili nimo sila makumbinsir, liboga ang ilang pangisip”.  Fezteleern ang politika!

Pagtinô kon luwas ba

Matud pa ni DOH Secretary Francisco Duque III, suwayan niya pagkumbinsir si Presidente Duterte nga magapabakuna batok sa COVID-19 ug nga ipublikar kini aron maawhag ug madasig usab ang katawahan nga magpabakuna.  Apan wala mopasalig si Duque nga magpabakuna sila uban sa Presidente agi ug pag-duyog sa naulahi.  Sakto ang panahom sa kadaghanan: “Unahon pagbakuna ang mga politiko ug kadagkoan sa Pililipinas. Kon walay sayd-epek, luwas ang bakuna; Kon adunay mahitabo sa mga politiko, luwas ang Pilipinas”.  Payts keyu!

“Katulog”-tambal sa insomnia

Ni’ng padayon nga pagsaka sa presyo sa matag kilo sa karne’ng baboy, misugyot ang Department of Agriculture nga mobalhin ang konsumidor pagpalit sa karneng manok, isda ug itlog isip alternatibo.  Igo ra sa pagtudlo ang DA kon unsay ihulip sa mahal nga karne.  Wala sila’y gi-anunsyo nga tabang alang sa mga mag-uuma ug katawhan aron ma-padayon ang suplay sa merkado sa maong palaliton.  Sama ra ang gisulti sa DA sa tambag sa doktor ngadto sa pasyente nga gi-INSOMNIA kinsa, giingnan lang sa doktor nga, “KATULOG LANG”.  Madahaaan!

Basta apó, sapopó!

Aprobado na sa IATF-EID ang pagluag sa restriksyon sa mga bata nga nagpangedaron og 10 anyos pataas ug sila tugotan na nga makagawas sa panimalay sugod karong Pebrero 1, 2021.  Girekomendar ang maong polisiya sa economic cluster sa IATF sa tumong nga mabuhi pagbalik ang ekonomiya.  Alegre na usab ang mga kan-anan; purdoy na pud ang mga apohan.  Apan sige lang, kay matud pa ni Jose Rizal, “Ang mga kabatan-onan man maoy paglaum sa nasud”.  Tana mag-ambahan!

Nakabayad na daan

Mipasalig si Foreign Affairs Asst. Secretary Eric Gerardo Tamayo atol sa pagdungog sa Senado nga ang mga transaksyon sa Pilipinas sa pag-secure sa bakuna batok COVID-19 walay poltikanhong higot nga nadugtong tali sa mga partner/supplier niini.  Gitataw ang maong pasalig tungod sa baniog nga giingong donasyon nga bakuna gikan sa China. Sa kadugay na nga mipahimulos sa China sa atong kadagatan ug pagyatak sa atong soberineya diha sa West Philippine Sea, dili na tinuod kinahanglan nga butangan pa’g potikanhong higot ang ilang ihatag nga bakuna. Nakabayad na daan ang Pilipinas. Baya no!