Theological virtues ug ang pandemiya

Gidungog nga dunay laing mutation sa virus karong mga panahona. Ug matud pa mas kuyaw pa kay sa niaging virus. Kini ang hinungdan nga kinahanglang maalarma gyud ang tanan.

Ning panahona mahinungdanon kaayo nga huptan nato ang tutulo ka mga teolohikanhong birtudes kun theological virtues nga naglangkob sa pagtuo, paglaum ug paghigugma aron sa ingon makalahutay ta sa gihapon ning panahon sa dakong kalisdanan. Pagtuo nga ang Dios dili mobiya kanato ning panahon sa dakong kapaitan.

Malisod man tuod alang kanato ang tanan sa Dios dili gyud kita pasagdan ug labaw na nga dili kita niya talikdan.

Paglaum. Ang paglaum nga dunay nindot gihapon nga nahabilin taliwala ning nagkabati nga kalibotan gumikan sa mga panghitabo ug mga matang sa katawhan nga nagdala og kalampingasan sa tanan.

Paglaum nga makahaw-as ra gihapon kita. Paglaum nga duna kitay mahimo. Paglaum nga ang tanan mobalik ra gihapon sa normal bisan pa man sa dakong kalisdanan. Paglaum nga mahuman ra gyud unta ang tanan. Paglaum nga magpabilin gihapon kitang buhi taliwala ning tanan.

Paghigugma. Oo ang paghigugma nga pinasikad sa tinguha sa pagpakaylap og maayo kaysa kadautan. Pagpakaylap sa kalumo inay ang kabangis. Pagpakaylap sa bisan unsang makatarunganon kaysa bisan unsang kapintas.

Ang paghimo og maayo nga moresulta sa pagkamanggihatagon dili lang sa mga butang materyal kondili sa mga paghigugma ug pagtagad ngadto sa uban.

Kini ang hinungdan kun nganong hangtud karon angayan kitang magpakabuhi. Kay kun wala ang pagtuo malisud ang pagpakabuhi.

Kun wala ang paglaum daw hanap ang padulngan sa kinabuhi ug kun wala ang gugma malisod ang pagpadayag kun unsa ka makahuloganon ang kinabuhi.