Katalagman nga mugna ra usab sa tawo

Nakahiagum og sunodsunod nga dagkong pagsuway ang mga kaigsuonan nato sa Luzon, ilabi na kadtong mga naigo sa mga katalagman.

Murag gi-one-two-three sila sa kabangis sa kinaiyahan nga wala pa gani nakabangon sa epekto sa super typhoon Rolly, gilumsan pa og samot sa bagyong Ulysses nga nakamugna og grabeng paglunop sa tubig.

Tataw ug dayag kaayo ang nakatampo sa kadaut nga namugna nga mao ang issue sa kalikopan.

Moingon ang mga pilosopo nga mugna man kadto sa kinaiyahan kay gihapak man sa bagyo. Tinuod man pero kong napreserbar pa unta ang kabukiran nga puno sa kalasangan naa untay mosala sa tubig aron mapugngan nga molahos dayon sa patag.

Unsaon man nga ang bukid gipatag na, gipamutol ang mga dagkong punoan sa kahoy kay gi-develop sa mga subdivision ug uban pa nga mga land development.

Sa laktod nga pagkasulti gipatigbabaw ang kahakog sa mga nagpasiugda niini kay giuna ang ilang interest sa walay paghuna huna sa mamahimong epekto sa umaabot.

Nahitabo kini tungod sa panagkunsabo sa mga developer ug pipila ka mga kawani ug opisyal sa gobierno nga maoy nihatag og pagtugot sa mga proyekto.

Ubos sa pobre nako nga paminsar dili mugna sa kinaiyan ang nahitabong mga trahedya kondili usa kini ka “man-made disaster” mugna sa mga tawong hakog sa salapi.

Dili man nato mapugngan ang paglihok sa kinaiyahan kay mao man gyud kana ang iyang nature, aduna man gyuy bagyo nga moigo sa nasud apan gumikan sa walay puas nga pag abuso sa kalikopan mao kini ang atong nadangatan.

Nakita na nato ang epekto sa pagpasagad nga naghatod sa kaalautan sa kinabuhi sa mga tawo didto sa kaulohan. Basin ang mga tawo sa ubang mga dapit apil na dinhi sa Sugbo nga swerte kay wala kini masinati ang nahiaguman sa mga dapit didto sa Luzon, ayaw pagdahum kay posibleng mahitabo usab kana dinhi tungod kay pareho ra nga dunay mga miamong among sa atong kalikopan.

Tan-awa ang kabukiran nangapahak na kay gihimong subdivision busa mag-ampo nalang kita nga dili masinatian nato ang sitwasyon nga naghatag og kalbaryo sa atong mga kaigsoonan didto sa Luzon.

Labaw sa tanan iampo nato nga mahigmata ang tanan ug magpakabana sa pagpanalipod sa atong environment kay sa paghimo niini mapanalipdan nato ang atong kinabuhi.