Nakigrelasyon og minyo
Dear Atty. Divine,
Ang akong amiga adunay karelasyon nga minyo og aduna gani tulo ka anak. Dalaga pa ni akong amiga apan na in-love gyud siya sa lalaki bisan kun kini pamilyado na. Nagtrabaho ni ang akong amiga sa usa ka private company ug akong nahibaw-an nga naay pagkaestrikto ang maong kompanya ilabi na sa issue sa immorality. Ako nang gitambagan ang akong amiga sa pagputol sa iyang relasyon sa maong lalaki nga aduna nay kabilinggan apan wa man kini niya buhata. Ang akong pangutana kun mamahimo ba kini siyang mataktak sa trabaho kun mahibaw-an nga nakigrelasyon siya og minyo? Daghang Salamat.
Emma,
* * *
Dear Emma,
Basi sa atong balaod, ang usa ka empliyado mamahimong mataktak sa trabaho kun kini makahimo og serious misconduct. Kana maoy nalatid sa Article 297 (282) sa atong Labor Code. Ang Immorality mamahimong kabasihan sa pagtaktak sa empliyado ug hayan masud kini sa ground nga serious misconduct tungod sa pagpakigrelasyon og minyo nga nahasupak sa atong moral standards. Sa kaso sa imong amiga, kun mahibaw-an sa kompaniya kining iyang immoral nga binuhatan hayan manubag gyud siya niini, ilabi na kun ang asawa mismo sa lalaki maoy makadiskubre ug mosumbong sa kompaniya nga iyang gitrabahuan. Busa mas maayo nga sultian nimo ang imong amiga sa posible niyang pag kick out sa iyang trabaho kun mahibaw-an sa iyang employer ang iyang binuhatan. Thanks and God Bless.
Atty. Divine
* * *
Alang sa inyong pangutana, palihug lang sa pag email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
