Pastillas ni Presidente Duterte

Gipakigkitaan ni Presidente Rodrigo Roa Duterte sulod sa Malakanyang ang 44 ka mga opisyal sa Bureau of Immigration nga gisuspenso sa Ombudsman og unom ka buwan sa pagkalambigit niini sa pastillas scheme o paagi sa korapsyon.

Sa iyang pagpakigkita sa mga suspendidong opisyal sa Bureau of Immigration gusto silang huboan ni Presidente Duterte sa ilang pagkakurakot. Kini matud pa ni Justice Secretary Menardo Guevarra.

Sa ilang panagtagbo gipanghatagan ni Presidente Duterte og pastillas ang mga suspendidong opisyal sa Bureau of Immigration. Apan ang sulod sa pastillas nga gipanghatag sa Presidente salapi o kuwarta.

Human madawat sa mga suspendidong opisyal sa Bureau of Immigration ang pastillas nga ang palaman salapi o kuwarta, gihagit sila sa Presidente sa pagkaon niini. Hinuon wala sila pugsa sa pagkaon niini. Gipapili sila sa Presidente sa pagkaon sa pastillas nga iyang gihatag o sa paghatag niini ngadto sa unang makalilimos nga ilang masugatan.

Walay bisan usa sa gihatagan sa Presidente og pastillas nga salapi o kuwarta ang palaman ang nagreklamo o miangal sa gihimo kanila sa Presidente, matud pa ni Justice Secretary Menardo Guevarra.

Ang 44 ka mga opisyal sa Bureau of Immigration gipaubos sa Ombudsman og unom ka buwan nga preventive suspension tungod sa pagkalambigit niini sa pastillas.

Ang pastillas usa ka matang sa korapsyon diin ang mga langyaw kasagaran kanila mga taga-Tsina sayon ra kaayo nga makasulod-gawas sa nasud sa Pilipinas pinaagi sa suborno nga salapi nga giputos sa linukot nga papel nga sama sa pagkalukot sa delicacy nga pastillas.

Ang gihimo sa Presidente ngadto sa mga suspendidong opisyal sa Bureau of Immigration dili na kini bag-o tungod kay didto sa Davao iya pod kining gihimo ngadto sa usa ka tawo nga naningil og abang sa mga nagpuyo sa yuta bisan dili siya ang tag-iya.

Ang maong tawo gipakaon ni Duterte sa peke nga dokumento nga gigamit niini sa pagpangilad sa mga tawo nga iyang gipangayoan og abang sa yuta.