Ning panahon sa dakong kalisdanan

Usa sa akong mga naobserbahan ning mga panahona mao nga kun batan-on ka pa daghan kaayo ang magkinahanglan sa imong presensiya, serbisyo ug kahibalo. Ug kun dili ka mapuslan daw sama ka na sa uhot nga tunobtunoban sama sa usa ka tae.

Kini gyud tingali ang nigawas nga balansayon sa kadaghanan. Kining maong kahimtang maoy virus nga miut-ot sa kadaghanan kanato karong mga higayona. Ang kawalay pagpakabana sa mga kanhiay nahimong naningkamot alang sa kalamboan sa katilingban ang mahimong ilubong diha sa kalimot kay dako man og gasto uyamot kun sila hinumdoman.

Apan bisan kun ingon ini ang dagway sa kalibotan angayan natong himoon kining mosunod:

1. Paglikay aron mamahimong pait ang kalibotan alang nato. Mag-agad ra gyud ni sa paagi nga gisud-ong nato ang tanan.

2. Dili maayo nga magdumot kay kini man sa atong kinabuhi, pagbati makaut-ot.

3. Kun mohatag kita ato kining himoon sa paagi nga mas malipayon aron sa ingon mamahimong mas makahuloganon ang maong paghatag ug dili kini pagaisipon nga kalbaryo alang kanato kondili kabahin lamang sa paghatag sa atong isigkatawo nga makasinati sa gugma ug puangod taliwala ning kalibotan nga nagkusmod.

4. Ang hilom nga pagpaminaw ning panahon sa dakong kapaitan gikinahanglan. Daghan kaayo karong mga panahona ang nahimong nawad-an og gana bisan gani sa pagginhawa. Dunay mga nipili nga mas kutloon ang kinabuhi kaysa magpadayon sa pagpakabuhi apan walay igong kapaingnan.

5. Ang kinabuhi sa tawo sama sa usa ka binhi kun alimahan pag-ayo moturok kini’g molambo ug unya abto’g kahamtong sama sa atong tanum kay inumol man sa gugma, gugma sa isigkaingon. Ang awit nga tinagik ni Narcisa Fernandez naghulagway sa dakong hagit nga gikinahanglang gyud diay ang pagpakabana ug pagpatagamtam sa gugma ngadto sa uban.

6. Dunay mga tawo nga magpatagad dili tungod kay feeling nila sila sikat. Apan dunay mga tawo nga magpatagad tungod kay sila mismo nangindahay man sa dakong bili sa pakig-uban sa mga tawo nga giisip nilang mahinungdanon kaayo sa ilang kinabuhi. Apan ang ilang gipaabot wala gyud mahitabo kay mismo ang ilang gisaligan ang maglisud man og hatag niini ngadto kanila.

7. Ning panahon sa dakong kalisdanan angayan gihapon kitang magpasalamat kay bisan pa man kun sa kadaghanan giisip kitang salin apan sa Dios kita iyang mga pinili.

Daw sa midagayday ang mga luha sa akong mga mata sa dihang nabasahan ko ang chat sa akong higala nga buot nalang mopauli sa ilaha sa pamasin nga didto makita niya ang tinud-anay nga pahulay gikan sa iyang gihambing balatian.

Tinuod may kakuwangan siya tungod pud sa iyang mga binuhatan. Apan ang pagpunay og puyo sulod sa usa ka lawak ug padayong nangita sa kahulogan sa iyang nahimutangan karon usa man ka dakong balig-ot nga nagkinahanglan og mas masabtan nga tubag labina gyud ning dakong panahon diin ang gugma mahimong sabton diha sa halayo ug ang pulong gugma mahimong sabton ingon nga pagpalayo kanila nga atong gihigugma tungod ni Corona!