EDITORYAL - Modules gyud ang hinungdan?

Sa nanglabay nga mga adlaw gikan sa pagsugod sa binag-ong pamaagi sa pagtungha sa mga bata nunot sa pandemiya, dunay mga nanggawas sa social media bahin sa mga tinun-ang naghikog tungod ilang modular learnings.

Sumala pa nga giingong naglibog o naglisod ang mga bata sa pagsabot sa ilang leksiyon nga gipaagi sa modules.

Ang modules mao kadtong mga papel nga gipanghatag sa mga magtutudlo nga maoy patun-an ug ipatubag sa mga bata diha sa ilang mga balay.

Napugos ang DepEd pagbuhat sa distance learning tungod sa peligro gikan sa pandemiya sa COVID-19.

Kabalo na baya ang tanan kung unsa ka huot ang mga pangpublikong tunghaan mao nga dili layo nga magkatinakdanay gyud ang mga tinun-an og sakit kung ang klase karong tuiga parehas ra sa una.

Daan ng dunay mga supak aning pamaagiha kay para sa mga kritiko sa distance learning walay makat-onan ang mga bata pinaagi niini.

Karon nga adunay mga report kabahin sa mga batang naghikog dinhi sa Central Visayas, duna gyuy mga kiat og hunahuna nga nipasangil nga ang modules maoy hinungdan niini.

Gihimakak kini sa DepEd kinsa naghimo og kaugalingong imbestigasyon bahin sa nahitabo sa mga bata. Maayo nga gipakigkitaan sa kadagkoan sa DepEd ang mga ginikanan ug nasuta nga di ang modules ang hinungdan nga nagkutlo sila sa ilang kinabuhi.

Angay hinumdoman nga bag-ohay palang gilugakan ang restriksyon sa edad niadtong mga makagawas na sa balay bisan dunay quarantine.

Ning bag-o lang, ang IATF mitugot na sa mga edad 15 anyos padung 65 anyos nga makagawas human nga ang maong hut-ong gidid-ang makagawas sa balay dul-an na og pito ka buwan ang nakalabay.

Ang kabataan aktibo kaayo sa kinabuhi ug puno sa kalagsik, apan daghan kanila ang dili tanan lig-on og emosyon. Ilabi na kun wala kaayo magtagad kanila ang mga kabanay.

Karong nagsugod na balik ang klase pinaagi sa distance learning, gamiton unta kini sa mga ginikanan ug tibuok pamilya aron mag-bonding samtang nagtuon sa leksiyon aron motaas ang pagsalig sa mga bata sa ilang kaugalingon ug sa pamilya.