Pagpamalandong sa Malangkubong kaayohanc

Kini ang matang sa pagpangalagad nga wala kay laing buhaton gawas sa pagpabilin nga anaa lamang uban sa tawo o katilingban nga imong gialagaran. Ang maong pagpangalagad bisan wala kay gibungat nga mga pulong sa pagdasig o may gihimong dili kasarangan dako naman kaayo og kahimoan aron mahupay mo ang bisan unsang gihambin sa hingtungdan. Ning paagiha nahimong mas mapuslanon ang imong pagkaanaa bisan pa man kun sa imong tan-aw daw sa helpless ka.

Sa dihang gisaulog ang pangilin sa Mater Dolorosa nakita ko ang Mahal nga Birhen diha sa akong pagpamalandong nga nagusbat ang nawong sa kasakit nga nahiagoman sa iyang anak sa dihang nagbitay kini sa Krus ug nagpaabot na lamang sa pipila ka gutlo aron mabugto na gyud sa hingpit ang iyang gininhawa.

Apan bisan pa man sa iyang kawalay mahimo, ang pagbarog tiilan sa krus dako naman kaayo og kahupayan alang kang Jesus nga niadtong panahona nagkinahanglan dako uyamot sa iyang inahanong pagpangga kay bisan pa man kun si Jesus Dios nga matuod apan sa laing bahin tawo usab siya nga matuod.

Ning panahon sa dakong pandemiya nahimong daw sa tulokibon ang tanang mga lihok nato. Kay bisan pa man kun tuod dili kita mga medical experts apan ang pagpadayag sa atong pagpangga pinaagi sa atong pagkaanaa dako naman kaayo og mahimo aron ma-maintain sa matag usa kanato ang hustong panghunahuna ug panimuot. Nga bisan pa man sa dakong kalisod atong makita sa gihapon ang bili sa matag usa kanato ug kay nakita man nato ang bili sa matag usa nan, maningkamot kita nga magpakabuhi taliwala ning dakong kalisdanan.

Sa dihang padung kong mokaon og batchoy kay paborito ko man  kining pagkaona, may bata nga miduol kanako og miingon: “Kuya tagai ko og kwarta palit ko og batchoy!” Ako siyang giingnan ayaw na lang og pangayo og kwarta palitan na lang tika og batchoy!”

Ug samtang nagkaon kami nanumbalik sa akong panumdoman si Padre Hannibal Maria di Francia nga nahimong santos gumikan sa iyang dakong kamanggihatagon dili lang sa mga butang o salapi aron motabang kondili mismo ang iyang presensiya usa naman ka dakong gasa alang sa ubang katawhan nga iyang gialagaran.

Dili tungod kay anaa ka physically kondili ang imong kinabuhi hunahuna ug kasingkasing anaa gyud kuyog nila nga imong gihatagan og igong panahon sa dakong tinguha nga sila maalagaran.