Tuob

Ambot ngano nga na-isyo man kini karon dinhi sa atong dapit, hangtod nga nanggawas na ang mahait nga mga pulong batok ni bisan kinsa, taliwa niining atong kahimtang karon nga gikusokuso kita sa coronavirus pandemic.

Dili na lang unta ko mag-apil-apil niini, apan, tungod kay tunog na man kaayo kini sa mga sibya-anan radyo, mohangyo na lang unta ko nga ato nang hunongon ug likayan ang pagpanghimaraut sa isig-usa kanato.

Kon dili kalikayan ang paghisgot niini, kon mahimo dili lang ta magdinautay sa isig-usa. Ato lang pasagdan kadtong nag-advocate o nag-promote niini. Wa man tingali sila mamugos niini, ug wa man sad tingali sila moingon nga ang pagtuob makaayo o makatambal sa coronavirus.

Kon wala ug dili ka mouyon sa pagpa-tuob, diha lang kutob; ayaw daota ang mga mituo niini, hangtod nga ma-personalan na hinuon. Mag-respitohanay kita sa isig-usa. 

By the way, nakasuway ko anang pagpatuob sa mga gagmay pa kami, ug karon regular ko nga nag-inom sa giingon ni Gwen nga Turmeric.

Ug sa laing bahin, dili lang una ta mamolitika. Ato lang unang ipadaplin ang politika kay tingalig mosamot na hinuon kadaghan ang matakdan sa kagaw. Maoy gikinahanglan karon ang pagtinabangay, ang panaghiusa, ug dili ang pagbinasulay sa isig-usa.

Alang nako, kining kagaw sa politika mas grabe pa kay sa kagaw sa coronavirus. Mga paniid sa mga langyaw nga gumikan sa politika, wala gayud makauswag pag-ayo ang atong nasud.

Karon, niining atong pagkabilanggo sulod sa atong mga panimalay, sukad sa Marso hangtud karon, wa na gyud ko makagawas gikan sa among balay.

Hapit na nako mahurot ang mga movies sa Neflix, ug maoy akong namatikdan nga usahay i-feature ang kalamboan sa ubang kanasuran, akong nakita nga biya’ kaayo kita in terms of development bisan sa kasilinginan natong mga nasud dinhi sa Halayong Sidlakan sa Asia.

Kini, gumikan sa kagaw sa politika.

* * *

Ang Department of Education (DepEd) mi-release sa mga guidelines alang sa giingon nga  streamlined K to 12 curriculum, nga matud pa, mahimo nang i-download walay bayad gikan sa official online platform.

Kini, sumala ni Undersecretary for Administration Alain Pascua sa DepEd: “We have made the MELCs available for free download at DepEd Commons to help our teachers focus on what is most essential given the challenge in learning delivery this school year.”

So, kining maong mga guidelines gi-download na kini sa DepEd, gi-preparar sa Bureau of Curriculum Development (BCD), ubos ni Director Jocelyn Andaya ug giaprobahan sa  Curriculum ug Undersecretary, si Diosdado San Antonio. Padayon ni Pascua: “We are trying to make everything as accessible as we can, through DepEd’s Commons and our other available channels. It is upon us to make sure our teachers and learners have everything they need in order to continue learning.”

So, niining bag-ong alternative nga paagi sa pagtudlo ug pagkat-on, sa samang higayon, kinahanglan magkat-on usab ang mga magtutudlo.

Matud pa, mogamit ang DepEd sa mga radyo ug telebisyon niining pag-implement sa blended/distance learning sa umaabot nga school year 2020-2021. Ug dugang niini, ang DepEd manghatag sa revised curriculum alang sa SY 2020-2021. Hinaut nga nakaabot na ngadto sa mga magtutudlo ang mga guidelines nga atong gihisgutan dinhi.