Positibong panglantaw

Puol na kaayo magsige og paminaw o tan-aw sa padayon nga pagsaka sa gidaghanon sa kaso sa coronavirus. Bisan siguro kamo kasukaon na kay kada adlaw nalang mao ang balita, kada tan-aw nato sa social media mao gihapon segi lang si COVID-19 ang naa kanunay.

Gani kini ang naghatag og kabalesa o kahadlok sa mga tawo ilabi na kadtong dali ra kaayo maapektohan. Hinuon dili man kalikayan nga mobati pero panahon na siguro nga balihon usab nato ang atong panglantaw ngadto sa mas produktibo ug positibo sa mga nangaayo.

Dili nalang ta mopalayo, dinhi sa dakbayan sa Sugbo pastilan makalilisang gyud ang gidaghanon kay kapin sa dos mil naman ang total.

Siguro kon ang ubang mga dapit makasinati og ingon niini ka daghan sobra na siguro sa panic ang bation, kay ang ubang LGU nga naay kasong maihap pa lang sa tudlo puwerte naman kaayo ang ilang ka praning.

Pero makita nato kon giunsa sa pag-handle sa Cebu City ang kadaghan sa gitaptan sa COVID-19 sa syudad, imagine dos mil kapin? Apan imbis magpadaug sa kahadlok, gi-handle kini sa kalmadong pamaagi.

Wala maghuot sa mga tambalanan ang nataptan sa virus, murag wala man gani pa mabutangi og pasyente kanang pasilidad nga naa sa North Reclamation Area alang niadtong naay sakit na gyud.

Nganong wala kini mahitabo tungod kay na-manage og tarong sa syudad ang protocol nga gipatuman.

Una, 90 % man siguro nga nataptan sa COVID-19 mga asymptomatic nga ilang gibutang sa mga isolation centers sa baranggay kinsa naka-rocover bisan walay medical intervention, tungod lang kay gi boost ang ilang immune sytem sa vitamins, pagkaon ug exercise.

Imagine kon gideretso pa sa pag admit sa mga tambalanan kining mga tawhana, segurado maparehas sa ubang dapit nga naay shortage sa hospital kay bisan kadtong mga asymptomatic gi-admit man busa ang uban nga mga masakiton nga dili covid wala na maatiman.

Ang dakbayan sa Sugbo adunay dul-an sa 1,600 o milapas na ba kaha nga COVID-19 recoveries o nangaayo sa balatian ug naapsan na ang active cases nga kapin nalang sa 900.

Tinuod ang giingon kaniadto ni Dr. Daisy Villa sa Cebu City Health Dept. sa akong interview nga self-limiting ang virus nga mawagtang ra human sa pipila ka adlaw kon lig-on ang resistensya.

Taliwala pa man sa wala pagsinabtanay sa mga tinugyanan sa Cebu City Hall niadtong nakalabayng mga semana, apan napatuman nila ang epektibo nga intervention sa coronavirus.

Si Mayor Edgardo Labella bisan maklaro nga luya ug dunay gipamati sa lawas pero padayon gihapon sa iyang pagpanguna sa kalihokan.

Dili man usahay visible sa media kay gikinahanglan usahay nga mopahuway o busy, pero makita man ang iyang agi.

Dili lang nato tan-awon ang negtibo o puros saway sa mga namunoan kay dili lalim ang ilang giagian sama sab nato nga yanong lungsoranon.

Inay manaway kita, bisan pasalamat ato nalang pud ihatag kanila, inay tan-awon nato ang nagkadaghan nga kaso, atong tan-awon ang nangaayo.

Ingon niana ang positibo nga panglantaw nga gamit kaayo aron kita maka-move on na sa atong kinabuhi ug panginabuhi.