Wa kinahanglanang kalibog sa lagda
Hangtod sa akong pagsuwat ini gahapon sa hapon, pila na lang ka takna sa di pa ang gitakdang pagpaluag sa mga lagda sa enhaced community quarantine (ECQ) sa tibuok nasud, wa pay pung gikan sa Inter-Agency Task Force for the Management of Emerging Infectious Diseases (IATF-MEID) kon:
Tugotan bang Cebu City, Mandaue City, Lapulapu City, Talisay City, Minglanilla ug Consolacion nga magpabilin ubos sa ECQ; o
Idayon ba pagpaubos sa modified ECQ ang Cebu City ug general community quarantine (GCQ) ang Mandaue, Lapulapu, Talisay, Minglanilla, Consolacion ug ubang bahin sa Sugbo.
* * *
Maong kasagaran sa lokal nga mga opisyal sa Metro Cebu wa kahibawo unsay ilang pangandaman—ang pagpadayon ba sa pagpatuman sa naandan nga mas higpit nga mga lagda sa ECQ o ang pagpaluag na ba sa mga lagda sa GCQ sama sa pagpangabli sa pipila ka negosyo, paggawas sa mga pinuy-anan sa pipila ka mamumuo aron makatrabaho ug pagpadagan sa mga sakyanang pamasahero.
Nakaseguro ko nga maklaro na ang mga kategoriya sa imong pagbasa ini. Apan tungod sa kaapiki sa panahon sa pagpahibawo ug pagpasabot, unsa kahapsay ang pagpatuman?
* * *
Ambot kanus-a pa makaamgo ang lokal ug nasudnong mga opisyal sa gobyerno. Makalibog nang daan ang subsob nga pag-usab-usab sa mga lagda, mas lisod alang sa katawhan ang pagsubay kon ang kausaban sa mga lagda dihadiha dayon ipatuman sa way paghatag nila og higayon sa pagpahaom sa nag-usab-usab nilang inadlaw nga panikay-sikay.
Wa pa gani ta maghisgot maato ba sa mga polis ug mga sundawo pagsuhito ang bag-ong mga lagda (kay wa pa mahuman ang lalis sa checkpoints sa karaang mga lagda).
* * *
Nipasalig ang IATF-MEID nga naumol ang bag-ong mga lagda human sa lapad nilang pangonsulta sa tanang eksperto ug buhatan sa gobyerno ug pribadong mga kompaniya.
Klaro hinuon nga, pinasikad sa kadaghan sa apelasyon nga ilang nadawat gikan sa mga mayor, nakalimtan nila pagkonsulta ang local government units (LGUs).
Ang lokal nga mga opisyal nag-iyahay sab paghimo sa ilang kaugalingong mga lagda kinsay makasud-gawas sa ilang mga utlanan.
Bisan nabantang na nga ang nahaunang nagkasungi nilang executive orders nisangpot sa wa kinahanglanang kahasol ug kalangay, nagdumili gihapon paghiusa sa ilang mga lagda.
* * *
- Latest
