Nagyagaw ang kamada

Taliwala niining seryosong isyu sa Coronavirus Disease or COVID-19, nga mitay-og karon sa tibuok kalibotan, dakong pangutana kun unsa gayud ka andam ang Sugbo kun simbakong motumaw ug mokuyanap gayud ang maong sakit dinhi.

Dili nato ikalimod nga kulang kita sa modernong kahimanan ug pasilidad pag-accommodate niadtong nataptan na sa maong balatian.

Ambot kun moarangkada na ba unya ang panagang sa atong mga lokal nga opisyal ug health authorities sa panahon nga mobutho ang unang kaso sa COVID-19 dinhi. Kay sa akong nakita, morag nagyagaw pa ang tanan. Pananglitan, aduna kunoy quarantine facility nga giandam ang kagamhanan sa lalawigan diha sa Barangay Apas ning dakbayan sa Sugbo alang niadtong gikan sa mga China, Hong Kong ug Macau nga motugpa diha sa Mactan Cebu International Airport. Apan matud pa, daghan kuno ang kakulangon sa maong pasilidad: kulang sa tubig, elektrisidad, katri ug pagkaon. Kini basi usab sa mga mga testimoniya sa mga na-quaratine didto basi sa report sa mga pamantalaan sa niaging semana.

Miani hinuon kini og mga pagbatikos gikan sa katawhan. Matud pa sa uban, dili na lamang unta magpatugatuga ang mga lokal opisyal pagkarakara kun walay igong plano alang sa hapsay nga sulbad sa unsa mang problema.

Rebenta sa kagamhanan nga dili kuno makapaabot kadtong mga persons under investigation sa COVID-19 nga sama sa hotel ang ilang puy-an atol sa ilang pag-quarantine ug nga kun gusto kuno sila og hamogaway nga kapuy-an, nan adto na lamang sila puyo sa hotel.

Apan kinsa bay gusto magpa-quarantine? Wala man siguro. Kay kagustohan man lagi sa gobiyerno nga ipalayo una sulod sa 14 ka adlaw kadtong mga gikan sa China, Hong Kong ug Macau, nan obligado kini nga moplastar og hamogaway nga quarantine facility.

Hinuon, daghan usab ang nakasabot sa karakara nga pagresponde sa atong kagamhanan batok niining bag-ong coronavirus.  Dili lalim ang pagpangandam batok sa kinalit nga pagtuyhakaw sa mga balatian sama sa COVID-19.

Apan nunot sa maong kontrobersisya, hinaut nga nakaamgo na kining atong mga opisyal ug nakat-on sa leksiyon gikan sa mga reklamo niadtong nailalum sa quarantine.

Dili usab lalim nga pugson ka sa pag-quarantine nga mabutang na hinuon ka sa dili makatawhanong sitwasyon.