Facemask penalty gisampolan dayon

Subra ka gamhanan ang Coronavirus Disease o COVID-19 nga nanglupad gikan sa Wuhan, China. Libolibo na ang nagtakdanay didto ug gatosan na ang nangamatay. Usab, nakasulod na kini sa nagkalainlaing nasud. Hinungdan, matag lider sa kanasuran nangitag mga epektibong paagi nga mapugngan ang maong kagaw aron dili makasulod sa lawas sa ubnang tawo. Kay sa higayon nga makasulod, delikado kon ang nahitabo niadtong mga biktima sa Wuhan, kinsa pipila, nagbarog lang, kalit lang natumba ug namatay, mahitabo sab dinhi sa ato ug sa ilaha.

Gani, akong kinamagulangang anak nga atua na puyo sa Canada napugos pagpakanselar sa iyang flight paingon sa Pilipinas. Kay mo-stop over man sa Hong Kong ang eroplanong iyang sakyan. Sa Canada, gidasig sab sila pagsul-ob og facemask. Hinungdan, nga kusog kaayong halin niini tibuok kalibotan. Ang nakaayo lang didto, walay overpricing.

Dili pareha sa Pilipinas diin bisag gipasidan-an na sa gobiyerno ang mga negosyante nga dili patas-an ang presyo sa nagnihit nga facemasks, may gahi gyod nga misupak niini.

Ipadakop bitaw ni Manila City Mayor Isko Moreno kinsa mi-order nga sirad-an ang mga negosyo sa nangadakpan. Da, tagam lagi ang mga mapahimuslanon!

Dinhi sa siyudad sa Sugbo, mimandar sab si Mayor Edgar C. Labella nga sikopon kining mga bentahosong magpapatigayon.  Kay aduna poy mga tindahan nga namaligyag overpriced facemasks. Daghan. Pero hangtod sa pagsulat niini, wala pay usa ang nadakpan. Kulang kahag kaisog ang mga mananakop?

Pero bilib ko sa taga LTFRB Region 7, kay facemask penalty, gisampolan dayon. Napulo ka drayber og mga depasaheroang sakyanan giisyuhan gilayog violation ticket for not wearing facemask while driving: pito ka PUJ, duh aka taxi ug usa TMD sama sa Grab. Aw, buslot bulsa sa mga drayber! P5,000 goy multa.

Kini sa naatlan ug na-report lang, ha? Kadtong mga nakalusot? Wala kahay amicable settlement nga gibuhat? Hinaut nga dili magpadala ang mananakop sa mga tentasyon nga makaguba sa balaod. Kay sa tinuoray lang, kining P5,000 puwerte ra ning dakoa. Ug delikado sa sabotsabot.

Luoy sab baya mga drayber. Unsaon, wala nay facemask nga mapalit. Sa bagay, balaod, balaod. Naay uban ay, bra na lay gi-facemask!