EDITORYAL - Makaya ba sa Pilipinas?

Nunot niining sari-saring mga balita bahin sa makamatay nga sakit nga novel coronavirus (nCoV) sari-sari usab ang panglantaw ug opinion sa katawhan kun unsaon kini pagsulbad o pagpakgang nga dili na makatakboy pa sa uban.

Dinhi sa Pilipinas, gumikan sa kapaspas sa pagkatap sa mga impormasyon kada adlaw, ang uban tinuod apan mas daghan way basehan, nagusab-usab pud ang pagtan-aw sa mga tawo bahin sa hitabo.

Sa pagsugod palang sa maong sakit didto sa Wuhan niadtong bulan sa Disyembre, ang una dayong gibasol mao ang mga tawo didto kay hingaon og mga ihalas nga mga hayop o exotic foods, sunod gibasol ang gobiyerno sa China, dayon ang tanan nang mga nagpuyo didto.

Dinhi sa Pilipinas, gibasol sab sa mga tawo ang gobiyerno kay wa dayon i-ban ang pagsulod sa mga Chinese, karon duna na hinuoy kompirmadong nagdala niini dinhi.

Karon gi-ban na ang pagpasulod og mga Chinese gikan sa Wuhan, Hubei Province, Hong Kong ug Macau, daghan gihapong mga nagbagulbol.

Pagkatinuod, ang pag-ban usa kini ka klasiko ug kinaraang pamaagi apan epektibong pangsanta sa pagkatap sa mga sakit kaniadto pa. Kinahanglang buhaton kay para kini sa proteksyon sa mas kinabag-an ug dili angay ikalain kay dili lang ang Pilipinas ang naghimo niini karon.

Kun di i-ban,  kada adlaw gatosan o liboang Chinese ang modagsa dinhi. Kaya kaha sa Pilipinas sila i-quarantine sud sa 14 ka adlaw? Unya hangtud kanus-a man? Magsige lang tukod og quarantine area kun dunay bag-ong mangabot?

Mas advance ang siyensiya sa medisina sa China itandi sa Pilipinas. Mao nga di nalang magtugatuga.

Sa mga walay ikatampo pagsulbad sa problema, maayo tingaling pasagdan nalang ang gobiyerno sa ilang ginbuhaton kay makapasamot lang sa kabalaka kining pagpasapasa og mga way basehan nga mga impormasyon diha sa social media.

Angay timan-an nga kun nahadlok kita, mas labaw na ang mga Chinese. Dili sila ang kaaway dinhi kondili ang virus.