No parking, no mercy

Ang balaod gihimo aron adunay sumbanan ang katawhan nga maoy sundon. Dili lang kini para sa katilingban, kondili, lakip sab ang nagpanday.

Panahon nga adunay mobawog niini aron ang salaod matakpan, ang maong balaod hingpit nga mawad-ag bili ug maoy mopuli ang kaguliyang.

Dapat ang balaod walay gipili. Dapat ang balaod dili moilag igsuon, higala o minahal sa kinabuhi. Samot na kon ang nakasala mismo, mao ang magbabalaod. Dapat angay doblehon ang silot nga ipahamtang, kay imbes siya maoy mohimog maayong ehemplo, siya na hinuoy miunay pagguba.

Sa Pilipinas, diha sa Senado, Kongreso, lawak-hukmanan (ma-lower court man, o Supreme Court), pirme natong masaksihan kon kapila nila bawga ang Batakang Balaod, diin ang puti nahimong itom ug ang itom nahimong puti. Labi nag ang magkaaway sa korte, kabos batok adunahan.

Matud nila, “in every rule there is an exemption.” No, sayop. Dakong sayop! Tungod kay ‘in every exemption, rule becomes no longer a rule.’  Nganong magpanday pa mag balaod kon may exemption sa makasupak? Useless!

Apan saludo ko sa mga taga Cebu City Transportation Office (CCTO), kinsa hugtanong miimplementar sa No Parking Policy sa kadalanan sa downtown ug sa nanagdupang mga karsada nga naglibot sa Basilica Menore del Santo Niño. Kay kutob sa mga sakyanang  miparking sa gidiling zones and lanes gipangklaman. Ang mga badlongong motorsiklo gipangkarga samtang ang mga four wheels gi-tow o giguyod.

May pipila sa nadakpan, taga probinsiya. Mituyo lag anhi sa siyudad kay motambong sa misa-nobena alang sa naghinangat nga kapistahan ni Sr. Santo Niño. Gipaminaw sa mananakop ilang pahayag pero wala gyod molugak ang kahuot-katuskig sa unipormeng gisul-ob sa taga CCTO. Nakabayad gyod ang mga bisitang dumuduong sa tukmang multa. Sanglit, ‘ignorance of the law excuses no one.’

Ginikanan mismo sa uyab sa akong anak, kinsa ang amahan usa ka opisyal sa military, ilang sakyanan sa pamilya nga giparking sa gidiling daplin halayo sa Basilica, giklaman sab. Wala gyod pasayloa sa mga mananakop, diin kon buot hunahunaon, kauban ra nila kay pareho man silang otoridad sa balaod.

Dinhi gipakita sa mga tagta CCTO nga ilang No Parking Policy walay gipinig. Dakpon gyod nila ang masipyat without mercy. Pagkatahom nga pagpangalagad. Kapanaminan!