EDITORYAL - PCG ngadto sa WPS

Base sa mga pamahayag ni Pres. Duterte kabahin sa relasyon sa Pilipinas ug China sa isyu sa West Philippine Sea , duha ka nasud magrespetaray sa soberiniya sa usa’g usa apan dili niya itugot nga itugyan ang lugar sa higanteng silingan.

Sa nakalabay nga tulo ka tuig gikan paglingkod ni Duterte nakita ang pagpanghawod sa China diha sa WPS, nanghasi ug nanghulga sa mga mananagat nga Pilipino ug daw sila nay tag-iya sa lugar.

Gawas pa niini kaning malampuson nilang pagtukod og artipisyal nga mga isla sa maong lugar nga naa gyud sa sud sa 200 exclusive economic zone nga nalatid sa UN Conventions on the Law of the Sea (UNCLOS).

Karon ang maong mga isla nga gipangangkon sa China nga pang-sibilyan lang, gidudahan nga gigamit sab nga forward military bases isip pangdepensa sa posibleng pag-atake gikan sa Pasipiko diha sa ilang nasud.

Angkunon man o dili sa gobiyerno, matawag na nga dunay ‘de facto’ control ang China sa WPS.

Ilabi na nga wala silay panabi kun mositar sa mga barko o abyon sa Pilipinas nga molawig sa lugar nga daw sila maoy tagbalay.  Di palang dugay  giabog sa mga barko sa China ang Liberian-flagged oil tanker nga ang crew pulos mga Pilipino diha sa Panatag Shoal.

Mandato gyud sa Philippine Coast Guard ang pagbantay sa WPS ug sa kadagatan niini, mas maayo gihapon nga gikan mismo ni Transportation Secretary Arthur Tugade ang kamandoan nga ang PCG mao nay mobantay sa maong dapit.

Lahi ra gyud kun gikan mismo ang mando sa kalihim sa ahensya, kay sama ra kini nga ang Department of National Defense pananglitan momando sa Armed Forces of the Philippines (Philippine Navy ug Philippine Air Force) nga bantayan ang lugar.

Karon nga nadugangan na ang mga gamit sa PCG wa nay rason aron di sila makapatrolya 24/7 sa WPS aron bantayan ang interes niini sama sa gibuhat sa China.