Hugaw sa iring

Literal nga nag-anam og kahugaw ang politika sa Dakbayan sa Lapu-Lapu human nabulit sa hugaw sa iring ang mga lamesa ug mantel nga gigamit sa mga staff ni Congresswoman Paz Radaza diha sa lobby sa City Hall.

Dugay na nga gihinginlan ni Mayor Junard “Ahong” Chan si Radaza nga ibakanti ang buhatan niini sulod sa City Hall.

Matud ni Chan nga gamiton niya ang lawak nga giakupar ni Radaza. Apan ang congresswoman nagmagahi ug miinsistir nga duna siyay katungod basi kuno sa ordinansa nga depektoso kay wala mapublikar.

Nangugat si Radaza nga magpabilin ang iyang buhatan sulod sa City Hall bisan sa opinion sa Department of Interior and Local Government nga dili siya mahimong mamugos kun dili mosugot ang mayor.

Gisirad-an na ni Chan ang opisina ni Radaza apan nagbutang ang congresswoman og mga lamesa alang  sa iyang staff gawas sa gikandaduhan niyang buhatan.

Matud ni Radaza dili gyud siya mohawa tungod kay andam niyang abangan ang maong buhatan. Tubag ni Chan wala siya magkinahanglan og abang. Ang buhatan maoy iyang gustong kuhaon aron magamit sa dakbayan.

Ngano ba’ng mamugos man si Radaza nga moabang sa lawak nga dili paabangan?

Ang kinaiya nga gipakita ni Radaza maoy taras sa mga aroganteng politiko nga ang ilang gusto maoy masunod bisan og dili husto.

Unsa kahay iyang bati-on og dunay mamugos pagpuyo sa ilang pinuy-anan ug moinsister nga moabang?  Tataw nga ang motibo ni Radaza mao ang pagbalda ni Chan sa iyang mga gimbuhaton.

Buot niyang ganuyon ang mayor sa way hinungdan nga away politika aron malimtan ang mas mahinungdanon nga tahas pagserbisyo sa mga Oponganon.

Sa samang higayon buot ni Radaza nga pabilin siyang makit-an sa publiko diha sa City Hall sa pamasin nga sa sunod eleksiyon dili siya hingpit makalimtan.

Apan kun ingon niini ang paagi sa iyang pamolitika, way duda nga lisud na alang sa ilang pamilya ang pagbalik sa pwesto.

Kun magpadayon si Radaza pag-insister sa sayop niyang baruganan, wala kinahanglana nga tubayan siyang Chan sa iyang pamolitika.

Igo na ang mga libudsuroy nga iring sa City Hall nga mopahinumdom ni Radaza matag buntag sa kahugaw ug ka baho sa iyang pamaagi.