EDITORYAL - Parke ni Lapulapu sa SRP

Dunay planong magtukod og parke pahinungod sa labing unang Pilipinong bayani nga walay lain kondili ang Sugboanong si Datu Lapulapu diha sa South Road Properties sa Cebu City.

Dili ang siyudad sa Sugbo ang nisugyot niini kondili ang National Historical Commission of the Philippines (NHCP). Ang NHCP buot nga magtukod og Quincentennial National Park alang sa umaabot nga ika-500 nga kasumaran sa pagkadiskubre sa Espanya sa Pilipinas niadtong 1521.

Matud pa nga ang plano sa NHCP, parke nga susama kalapad sa Luneta Park didto sa Manila nga diin gibutang ang monument sa Nasudnong Bayani nga si Dr. Jose Rizal.

Didto sab luyong bahin sa estatwa ni Rizal gibutang sab ang higanteng estatwa ni Datu Lapulapu nga nahimo sab nga atraksyon didto.

Pagkakaron adunay shrine pahinungod kang Lapulapu ang Dakbayan sa Lapu-Lapu diin usab gihimo ang tinuig nga kasaulogan sa Kadaugan sa Mactan nga gitawag kaniadtong Bahug-Bahog sa Mactan.

Ang tinuig nga selebrasyon dunganan og reenactment sa nahitabo niadtong 1521 dihang nalupig ni Lapulapu si Ferdinand Magellan ug iyang mga sakop.  Ang selebrasyon dugokon gyud og mga turista, dili lamang mga Pilipino kondili hasta mga langyaw ug bisan gani mga Espanyol nga turistang posibleng buot sab madugangan ang kaalam bahin sa ilang kasaysayan.

Labing una kadtong engkwentro nga nabutang sa kasaysayan tali sa mga Pilipino batok sa mga taga Uropa. Apan wala kini nahitabo sa Cebu City kondili sa kaatbang nga isla sa Mactan.

Hinuon, naghuot na ang Lapu-Lapu City ug duna nay monumento si Lapulapu didto. Samtang ang SRP, lapad pa kaayo ang kabutangan og parke para sa Sugboanong bayani.

Masabtan ang sentimiyento sa mga Bisaya ilabi na ang mga Sugboanon bahin sa pagbutang sa estatwa ni Lapulapu didto sa Manila inay nga dinhi sa Sugbo.

Apan kun magtukod og ingon niini kadako nga parke, husto ba nga sa SRP sa Cebu City ug dili sa Lapu-Lapu City sa Mactan Island kini ibutang?