Ayaw kompiyansa

Agosto 4, 2019: Ikanapulog-Walo nga

 Domingo sulod sa tuig

Mga Pagbasa:  Ecc. 1‘;2;2;21-23/SA. 95

/Col./ 3;1-5,9-11/Lk. 12;13-21

Daghan nato ang nangita gyud sa gitawag natong seguridad. Mao nga mokayod kita taman sa ginhawa. Kuyog niini ang paghimo og mga butang nga magdala kanato sa gitawag natong kasegurohan.

Ang uban nato buot mokuha og daghang mga insurances. Tumong nato mao nga ini’g ka tigulang nato daghan kita og mahipos ug daghan ang makuha labina sa mga higayon nga kita masakit ug malandig sa tambalanan. Daghan nato ang buot mamahimong seguro hangtud nga atong kaugalingon na lamang ang atong makita ug nahikalimot kita sa uban.

Apan dili kita angay nga mokumpiyansa matud pa ni Jesus kini tungod kay ang kamatayon anaa lang sa atong kilid. Mag-unsa man tuod ang atong paningkamot kun ugaling moabot ang panahon nga ang tanan natong napundar ato lamang biyaan tungod sa gitawag nilang kamatayon?

Sa akong pagpanghipos sa akong mga butang padayon nakong gilain ang mga butang nga angayang dad-on ug sa mga butang nga angayan nakong ibilin. Sa akong pagpanghagpat wa kini magpasabot nga akong ibilin ang mga butang walay hinungdan ug way pulos ang maayo ibilin ang bisan unsa nga giisip natong mapuslanon ug bisan unsa nga giisip natong mahinungdanon ug maayo aron ang mahabilin dili mobasol kanato gumikan sa atong pagkahakog.

Mahinungdanon ang relasyon sa matag usa kanato mao nga sa atong panaw sa kinabuhi ato untang pangingkamton nga dili kita mamahimong masilaw sa bisan unsang butang molabay lamang hinunoa atong higugmaon ang tawo ug gamiton ang bahandi dili kay atong higugmaon ang bahandi ug gamiton nato ang tawo. Kay mag unsa man ang tanan mong paningkamot? Bisan ang kalibutan mahimo kun mapildi ang imong kalag? Sa akong pagpanghipos nakita ko ang akong kaugalingon nga nahimong malipayon dili tungod sa akong nakab-ot kondili tungod sa akong NADAWAT nga hinabang gikan sa Dios pinaagi sa mga tawo nga manggihatagon kaayo sa ilang kaugalingon.