Pagpili: hinawayon ka o salawayon ka?

Gikataho nga gisaway ni Senator Nancy Binay ang Philippine National Police tungod sa matud niya nga paghimo og dakong salida sa pagpanak-op sa mga outlets sa lotto nga gimando sa Presidente nga hunongon ug pasirad-an. 

Alang sa Senador, angayan nga hatagan unta og dakong pagtagad sa kapolisan ang pagpangdakop sa mga kriminal.  Managlahi nga mandato, managlahi nga baruganan apan usa ra ang lintunganay: Sa kalibutan, adunay tawo nga HINAWAYON, aduna usab tawo nga SALAWAYON! Na hala, pili kon asa ka?

Unsaon Pagpakgang

Si Justice Secretary Menardo Guevarra miluwat ug kamandoan sa NBI sa pag-imbestigar sa gikataho nga korapsyon sa PCSO nunot usab sa kamandoan sa Presidente sa pagpasira niini. Midason ang kalihim nga pasakaan gayod og kaso ang si kinsa man nga mapalgan nga sad-an.

Gibuhat na kini sa una, apan nahilom lang ang imbestigasyon kay nakadaug sa sweepstakes ang pangulo sa NBI. Unsa kaha karon ang mahunahunaan sa PSCO aron mapakgang ang imbestigasyon? Dili ba kaha usa pud unya kana sa ipangutana sa NBI ngadto sa kawani sa PCSO? Hinaut dili lang pud unta!!!

Korapsyon: Higala o Kaaway?

Ang kagamhanang lokal sa probinsiya ug dakbayan sa Sugbo mipadayag sa ilang suporta sa mando sa Presidente sa paghunong sa mga pasugal sa PCSO tungod sa gikataho nga halapad nga korapsyon. Kini bisan pa man kon nagdawatan sila og pahat nga ayudang pinansiyal gikan sa maong ahensya.  Mora’g sukwahi kini nga baruganan sa panahon sa eleksyon diin sagad sa mga kandidato magkanayon: “Tukba ang paon, iluwa ang taga”, nga buot pagasabton, “dawata ang kwarta’, apan ayaw botohi ang naghatag!  Korapsyon: usahay higala, usahay kaaway! Hala no?

Sila ra ang magtinabangay

Gilangkoban karon ang ika-18 nga Kongreso sa mga miyembro nga magkadugo kon paryente ra. Segun sa taho, dili momenos sa 50 ka Congressman ang adunay mga paryente sulod/kauban sa Kongreso.

Nagtamod gayod ang mga Kongresista sa panultihon nga “God helps those who help themselves.”  Ang mga paryente ra gayod ang nagsabot-sabot mao’ng wala na gayo’y paglaum nga mapasar ang “Anti-Dynasty Bill.” Saoonz!!!

Sadya tungod sa basura

Ang Cebu City Legal Office giingon nga mo-imbestigar sa mga tawo nga nakita ug nakuhaan ug hulagway og mikatap karon sa social media nga naglabay’g basura sa usa ka bakanteng luna sa may Echavez St. Naglaraw pa gani ang Legal Office nga iduso sa Konseho ang maong isyu alang sa usa ka halapad nga imbestigasyon. Human sa “Basura Mo, Sardinas Ko” nga Programa kaniadto sa siyudad, karon aduna na usab lain nga tulomanon nga tawgon lang nato og “Basura Mo, Imbestigahon Ko.” Hayan, sadya unya ang konseho kon madayon!