Wad-on ang sugal

Kay gisirado ni Presidente Rodrigo Roa Duterte ang sugal nga gipasiugdahan sa Philippine Charity Sweepstakes Office (PCSO) dili lamang tungod sa korapsiyon kondili tungod usab sa rason nga nagsalig na lamang ang mga Pinoy sa sugal, mas maayo nga wad-on na gyod sa hingpit ang tanang matang sa sugal dinhi sa nasud apil na ang sugal nga gipasiugdahan sa Philippine Amusement Gaming Corporation (PAGCOR).

Angayan ug matarong lamang gayod nga hunongon sa gobyerno ang sugal nga gipasiugdahan sa PCSO ug PAGCOR kun gusto man niini nga  seryosohon ang pagwagtang sa sugal dinhi sa nasud. Yam-iran man lang god sa mga sugarol ang atong gobyerno ug dili kini tuohan sa pagpanakop ug pagpahunong sa sugal kun ang tan-aw nila niini, mao kini ang pinakadako ug numero unong sugarol dinhi sa nasud.

Ang sugal mawagtang ug dili na kini molipang kun ang atong gobyerno hingpit gayod nga modili niini tungod kay ang sugal bunga sa sugarol nga katilingban ug dili sinunod sukwahi sa gituohan sa uban.

Ang katilingban nga sugarol ang naghimong sugarol sa katawhan sa Pilipinas ug dili ang ilang gigikanan. Wala man siguro natawo nato dinhi sa kalibotan nga nagdala nang daan og baraha ug makamao nang daan sa pagduwa og piyat-piyat? Labing siguro ang mga tawo nakamao sa piyat-piyat tungod kay mao kini ang kanunay nga makita sa iyang palibot.

Sa matang sa liderato nga gipakita ni Presidente Rodrigo Roa Duterte ug sa bagang suporta nga gihatag kaniya sa katawhan dili ko motuo nga dili niya mahimo ang pagwagtang sa hingpit sa sugal.

Kun parihason lang ni Presidente Duterte ang iyang kampanya sa pagwagtang sa sugal dinhi sa nasud sama sa kaagresibo sa iyang gilusad nga kampanya pagwagtang sa suliran sa gidili nga drugas, mas mauna pa pa seguro sa pagkawagtang ang sugal kay sa gidili nga drugas.

Busa ako nanawagan sa liderato ni Presidente Duterte sa pagwagtang sa hingpit sa sugal dinhi sa Pilipinas.